വിപണിയറിഞ്ഞ് കളിക്ക് രമണാ... തക്കാളിയിൽ കോളടിയ്ക്കാം..| പ്രമോദ് മാധവൻ

 

പോയ വർഷങ്ങളിലെ ട്രെൻഡ് വച്ചാണെങ്കിൽ ജൂൺ -ജൂലൈ മാസങ്ങളിൽ തക്കാളിക്ക് തീവില ആയിരിക്കും. ഈ മാസങ്ങളിൽ കിലോയ്ക്ക് എൺപതും നൂറും അതുക്കും മേലെയും പോയ വർഷങ്ങൾ ആയിരുന്നു 2022,2023, 24  എന്നിവ.പ്രധാന ഉത്പാദകരായ കർണാടകയിലെ കോലാർ ജില്ലയിലും മറ്റും എല്ലാക്കൊല്ലവും അമിത മഴയും വൈറസ് രോഗങ്ങളും ഒക്കെ സ്ഥിരമായി വെല്ലുവിളി സൃഷ്ടിയ്ക്കുന്നുണ്ട്. 

ഇന്ത്യയിലെ തക്കാളി ഭൂപടത്തിൽ കേരളം ഇല്ലേയില്ല. അല്പമെങ്കിലും വാണിജ്യകൃഷി ഇവിടെ  ഉള്ളത് പാലക്കാട്‌ ജില്ലയുടെ കിഴക്കുള്ള കൊഴിഞ്ഞാമ്പാറ, വടകരപ്പതി, എരുത്തേമ്പതി എന്നിവിടങ്ങളിലാണ്. അവിടെ തമിഴ്നാടിനെയും കർണാടകയേയും അനുസ്മരിപ്പിക്കുന്ന തരത്തിൽ തക്കാളി കൃഷി ചെയ്യുന്നുണ്ട്. അവിടങ്ങളിൽ വിളവെടുക്കുന്ന തക്കാളി, കേരള -തമിഴ്നാട് അതിർത്തിയിലെ  വേലന്താവളം ചന്തയിൽ നിന്നും തമിഴ് നാട്ടിലെ വ്യാപാരികൾ വാങ്ങി,  മറുനാടൻ ആയി,  വീണ്ടും കേരളത്തിലേക്ക് വരികയാണ് ചെയ്യുന്നത്.

പറിച്ച് നട്ട് 60-70 ദിവസം കഴിയണം തക്കാളി വിളവെടുക്കാൻ. തൈകൾ പാകമാകാൻ ഏതാണ്ട് ഒരു ഇരുപത്തഞ്ച് ദിവസവും വേണം. ഇപ്പൊ തൈകൾ തയ്യാറാക്കാൻ തുടങ്ങിയാൽ ഏതാണ്ട് ജൂലൈ ആകുമ്പോൾ വിളവെടുത്ത് തുടങ്ങാം.

പച്ചയ്ക്കും പഴുപ്പിച്ചും കറിയായും പ്രോസസ്സ് ചെയ്തും കഴിക്കുന്ന ഒരേ ഒരു പച്ചക്കറി തക്കാളി തന്നെ.

അരക്കിലോയിൽ അധികം വലിപ്പമുള്ള Beef Steak Tomato മുതൽ 15-20g വരെ മാത്രം തൂക്കം വരുന്ന Cherry Tomato വരെ ഉണ്ട് കൂട്ടത്തിൽ. 

തക്കാളി പഴമാണോ പച്ചക്കറിയാണോ എന്ന് തർക്കമുണ്ടായി അമേരിക്കയിൽ. 1887 ൽ പച്ചക്കറികൾക്ക് നികുതി ഏർപ്പെടുത്തുന്നതുമായി ബന്ധപ്പെട്ടായിരുന്നു അത്.നികുതിയിൽ നിന്നും രക്ഷപ്പെടാൻ തക്കാളി പഴമാണ് എന്നായി വ്യാപാരികൾ. നികുതി ചുമത്തണം എന്ന വാശിയിൽ പച്ചക്കറി ആണെന്ന് ഭരണകൂടം. ഒടുവിൽ ഭരണകൂടം ജയിച്ചു. തക്കാളി, പച്ചക്കറി തന്നെ എന്ന് കോടതി തീർപ്പാക്കി.

സ്പെയിനിലെ Valencia യിലെ ബ്യൂണോളിൽ നടക്കുന്ന തക്കാളിയേറ് ലോക പ്രശസ്തമാണ്. ഒരു ലക്ഷം കിലോ തക്കാളിയാണ് അങ്ങോട്ടുമിങ്ങോട്ടും എറിഞ്ഞ് അർമാദിക്കാറ്. സംഗതി ഒരു ഭൂലോക വേസ്റ്റ് ആണെങ്കിലും അതിലൂടെ തക്കാളിക്ക് ഒരു വലിയ വിപണി കിട്ടുന്നുണ്ട്.

ലോകത്ത് ഏറ്റവും കൂടുതൽ തക്കാളി ഉൽപ്പാദിപ്പിക്കുന്നത് ചൈനക്കാർ ആണ്. 

തക്കാളി ഇനങ്ങളുടെ സ്വീകാര്യത പ്രധാനമായും അതിന്റെ രുചി, കേടാകാതെ എത്ര ദിവസം ഇരിക്കും (shelf life ) എന്നുള്ളത്,

 നിറം, 

വിണ്ടു കീറാതെ  (cracking )ഇരിക്കാൻ ഉള്ള കഴിവ്, 

മണ്ണിലെ നിമ വിരകളെ ചെറുക്കാൻ ഉള്ള കഴിവ്,

 ഇല ചുരുളൽ(Yellow Leaf Curl Disease ) പോലെ ഉള്ള ഒരു കൂട്ടം വൈറസ് രോഗങ്ങളെ ചെറുക്കാൻ ഉള്ള കഴിവ്

 എന്നിവ കണക്കിലെടുത്താണ് നിശ്ചയിക്കാറ്. 

ഇപ്പോൾ വിപണിയിലെ താരം Indian Institute of Horticulture, ഹെസ്സർഘട്ട, ബാംഗ്ലൂരിൽ നിന്നും പുറത്തിറക്കിയ 'അർക്ക രക്ഷക്'  എന്ന ഇനമാണ്. തക്കാളികർഷകരുടെ രക്ഷകൻ തന്നെയാണ് കക്ഷി. കായ് തുരപ്പൻ, ഇല ചുരുളൽ, Early Blight എന്ന fungus രോഗം, ഇവ മൂന്നിനേയും ചെറുക്കൻ കഴിവുണ്ട്.

 വിദേശ രാജ്യങ്ങളിലേക്കും ഇതിന്റെ വിത്തുകൾ കയറ്റുമതി ചെയ്യുന്നുണ്ട്. Precision farming വഴി ഒരു ചെടിയിൽ നിന്നും 17 കിലോ വരെ കായകൾ ലഭിച്ചു എന്ന് റിപ്പോർട്ട്‌ ഉണ്ട്. ഒരു സെന്റിൽ നൂറിലധികം തക്കാളി ചെടികൾ നടാം. ഒരു ചെടിയിൽ നിന്നും ഒരു കിലോ വച്ച് കിട്ടിയാൽ പോലും ഒരു സെന്റിൽ നിന്നും ഒരു ക്വിന്റൽ തക്കാളി വിളവെടുക്കാം.

കേരളത്തിൽ തക്കാളി കൃഷിക്ക് ഏറ്റവും യോജിച്ച സമയം സെപ്റ്റംബർ മാസത്തിൽ നടുന്നതാണ്‌. 30-32 ഡിഗ്രി ചൂടിന് താഴെ അന്തരീക്ഷ താപനില ആയിരിക്കുന്നതാണ് തക്കാളിയ്ക്ക് നല്ലത്.. ചൂട് കൂടുമ്പോൾ തക്കാളിപ്പൂക്കളുടെ ജനിപുടം വരണ്ടു പോകുകയും പരാഗ രേണുക്കൾ വന്ധ്യമാകുകയും ചെയ്യും. പൂക്കൾ കായ്കളാകാതെ പോകും.

തക്കാളിയ്ക്ക് നല്ല സൂര്യ പ്രകാശം വേണം. 

പ്രകാശം കുറഞ്ഞാൽ ചെടികൾ ബലം കുറഞ്ഞ് , കോലിച്ച്,ഇലകൾ തമ്മിൽ ഉള്ള അകലം കൂടി (inter nodal length ) ഉൽപ്പാദനം കുറയും. പലരും സൺഷേഡിലും മറ്റും തക്കാളിചട്ടികൾ വച്ച് പരാജയപ്പെടുന്നത് കാണാം.

പക്ഷെ തക്കാളിയുടെ ഏറ്റവും 'മ്യാരക' മായ രോഗം ബാക്റ്റീരിയൽ വാട്ടം ആണ്. കേരളത്തിലെ മണ്ണിന്റെ pH അത് വരാൻ അനുയോജ്യവും . പിന്നെ ഇത് കൃഷി ചെയ്യുന്ന കർഷകരുടെ അജ്ഞതയും കൂടിയാകുമ്പോൾ "സ്വതവേ ദുർബല , പോരെങ്കിൽ ഗർഭിണി" എന്ന് പറയാം.

Ralstonia solanacearum( ഞാൻ വെള്ളായണിയിൽ പഠിക്കുമ്പോൾ ഈ മഹാന്റെ പേര് Pseudomonas solanacearum എന്നായിരുന്നു) എന്ന ബാക്റ്റീരിയയാണ് രോഗഹേതു. ( പിന്നെ Pseudomonas flurascens കോടതിയിൽ പരാതി കൊടുത്ത് , എന്റെ കുടുംബത്തിലെ ഈ മ്യാരകന്റെ പേര് എന്റെ സൽപ്പേരിന് പാരയാണ് എന്ന് ചൂണ്ടിക്കാട്ടി കക്ഷിയുടെ പേര് മാറ്റിച്ച് Ralstonia ആക്കി 🤣)

Ralstonia എന്ന ഈ ഭീകര 'മ്യാരക' ബാക്ടീരിയയുടെ പിടിയിൽ തക്കാളി ചെടി അമരാതിരിക്കാൻ എന്തൊക്കെ ചെയ്യണം? 

1.ഒരിക്കൽ ഈ രോഗം വന്ന മണ്ണിൽ ഇവൻ ദീർഘനാൾ അധിവസിക്കും.പിന്നെ സ്വക്ഷേത്രബലവാൻ ആകും.  ആയതിനാൽ ഒരേ സ്ഥലത്തുള്ള തുടർ കൃഷി(continuous cultivation in same place ) തക്കാളിയിൽ ഒഴിവാക്കണം. വിള പരിക്രമം (Crop rotation)  പിന്തുടരണം. പക്ഷെ മുളക്, വഴുതന, ഉരുളക്കിഴങ്ങ് എന്നീ മൂന്ന് ബന്ധു വിളകളും (മൂന്നു പേരും സൊളാനേസിയെ എന്ന സസ്യതായ് വഴിയിൽ പെട്ടവർ ) ഈ രോഗത്തിന് അടിപ്പെടും.വിള പരിക്രമം നടത്തുമ്പോൾ ഇക്കാര്യം പ്രത്യേകം ശ്രദ്ധിക്കണം.

2.മണ്ണിന്റെ pH 6 നും 7നും ഇടയ്ക്ക്‌ ആക്കി ക്രമീകരിച്ചിട്ട് വേണം തൈകൾ പറിച്ച് നടാൻ.  അതിനു വേണ്ടി സെന്റിന് 2 മുതൽ 3 കിലോ കുമ്മായം /ഡോളോമൈറ്റ് മണ്ണിൽ ഇളക്കി ചേർത്ത് രണ്ടാഴ്ച ഈർപ്പത്തോടെ ഇടണം. മാത്രമല്ല വലിയ അളവിൽ കാൽസ്യം തക്കാളിക്ക് ആവശ്യം ഉണ്ട് താനും. ഇല്ലെങ്കിൽ കായ്‌തുമ്പ് കറുത്ത് പോകുന്ന Blossom End Rot എന്ന് പറയുന്ന പ്രശ്നവും ഉറപ്പായും ഉണ്ടാകും. ആയതിനാൽ വളർച്ചാ ഘട്ടത്തിൽ രണ്ടാഴ്ചയിൽ ഒരിക്കൽ കാൽസ്യം നൈട്രേറ്റ് വളം 5 ഗ്രാം ഒരു ലിറ്റർ വെള്ളത്തിൽ കലക്കി ഇലകളിൽ സ്പ്രേ ചെയ്യണം.

3.Trichoderma യാൽ സമ്പുഷ്‌ടീകരിച്ച ചാണകപ്പൊടി വേപ്പിൻ പിണ്ണാക്ക് മിശ്രിതം തന്നെ മണ്ണിൽ അടിസ്ഥാന വളമായി നൽകണം.ഇത് ചെയ്യാതെ പിന്നെ രോദനം നടത്തിയിട്ട് കാര്യമില്ല. A stitch in time saves nine എന്നാണല്ലോ.. Well begun is half done.

4.നട്ട് രണ്ടാഴ്ച കൂടുമ്പോൾ 2% വീര്യത്തിൽ(20 ഗ്രാം/ലിറ്റർ)  സ്യൂഡോമോണസ് ലായനി ഒഴിച്ച് വേരുപടലം കുതിർക്കണം. മണ്ണിൽ സ്യൂഡോമൊണാസ്സിനെ എപ്പോഴും സജീവമാക്കി നിർത്തണം.

ഇത്രയൊക്കെ ചെയ്താലും ഈ രോഗം വരാമെന്നിരിക്കെ ചിട്ടയോടെ മേൽ പറഞ്ഞ കാര്യങ്ങൾ ചെയ്യാൻ പറ്റില്ല എങ്കിൽ ഈ പണിക്ക്‌ ഇറങ്ങാതിരിയ്ക്കയാകും ബുദ്ധി.Tomato farming is such a risky business. Just 'december' that.

 

No pain... no gain... അല്ലേ ഉത്തമാ..

പോഷകഗുണം പറയാൻ തുടങ്ങിയാൽ എന്റെ തക്കാളീ... നീ പൊന്നപ്പനല്ല, തങ്കപ്പനാ... 

Lycopene, Beta Carotene, Nanugenin, Chloragenic acid എന്നീ antioxidant കളാൽ സമ്പന്നമാണിവൻ.ഏത് കള്ള free റാ(സ്)ഡിക്കൽ വന്നാലും സുട്ടിടുവേൻ...

കാൽസ്യം, വിറ്റാമിൻ C, പൊട്ടാസ്യം എന്നിവ വേണ്ടതിലേറെയുണ്ട് . കിഡ്നി സ്റ്റോൺ ഉള്ളവർ കുറേശ്ശേ ശ്ശെ ശ്ശെ  മാത്രം കഴിക്കുക. 

ഒരു പഴത്തിൽ മാത്രം ഉണ്ട് ഒന്നര ഗ്രാമിലേറെ ദഹന നാരുകൾ. സുഖഭേദി തരും.

തൊലിയ്ക്ക് തുടിപ്പും മിനുപ്പും നിറവും നൽകും 

തക്കാളി ദിവസവും കഴിക്കാൻ വേണ്ടതിലേറെ കാരണങ്ങൾ...

നല്ല ഇനങ്ങൾ?

..ക്ക് ഒരു പഞ്ഞവുമില്ല. 

കാർഷിക സർവ്വകലാ ശാല പുറത്തിറക്കിയ 

ശക്തി 

മുക്തി 

അനഘ 

വെള്ളായണി വിജയ് 

മനുപ്രഭ 

അക്ഷയ...... അവിടെ,ചോദിച്ചു ചെല്ലുമ്പോൾ സ്റ്റോക്ക് ഉണ്ടായാൽ മ്മള് രക്ഷപ്പെട്ടു.

പിന്നെ അങ്ങ് ദില്ലിയിൽ നിന്നും 

പുസ റൂബി 

പുസ സദാ ബഹാർ 

പുസ ഉപഹാർ 

ബാംഗ്ലൂരിൽ നിന്നും 

അർക്ക രക്ഷക് 

അർക്ക വർദ്ധൻ 

അർക്ക അലോക് 

അർക്ക അഭിജിത് 

പിന്നെ മ്മടെ കോർപ്പറേറ്റ് സങ്കരന്മാർ 

ശിവം 

സരസ്വതി 

രമ്യ 

രൂപാലി 

അമോഗ്,

സാഹോ 

NS 815

ഹീം സോന... അങ്ങനെയങ്ങനെ. 

വെള്ള, ചുവപ്പ്, പിങ്ക്, പർപ്പിൾ, ചോക്ലേറ്റ്, ബ്ലാക്ക്, മഞ്ഞ ഇങ്ങനെ പല നിറങ്ങളിൽ തക്കാളി ഇനങ്ങൾ ലഭ്യമാണ്. തക്കാളി കൊണ്ട് തീൻ മേശയിൽ മാരിവിൽ പ്രപഞ്ചം തീർക്കാം.

മണ്ണ് കിളച്ച്,നന്നായി കട്ട ഉടച്ച്,  കുമ്മായം ചേർത്ത് രണ്ടാഴ്ച ഇട്ടതിനു ശേഷം ട്രൈക്കോഡെർമ്മയാൽ സമ്പുഷ്‌ടീകരിച്ച ചാണകപ്പൊടി, വേപ്പിൻ പിണ്ണാക്ക് മിശ്രിതം, എല്ലുപൊടി, ചാരം, കടല പിണ്ണാക്ക് പൊടിച്ചത് എന്നിങ്ങനെ "ആനമയിലൊട്ടകം"  ജൈവ വസ്തുക്കൾ, അവനവന്റെ കഴിവ് പോലെ അടിവളമായി നൽകിയിട്ട് വേണം നാലാഴ്ച പ്രായമുള്ള തക്കിടിമുണ്ടൻ തൈകൾ (4-5 ഇലകൾ ഉള്ള നീണ്ട് വളരാത്ത ) പറിച്ചു നടാൻ. വൈകുന്നേരം പറിച്ചു നടുക. രണ്ടു മൂന്നു ദിവസം തണൽ നൽകുക. 

വരികൾ തമ്മിലും  വരിയിലെ ചെടികൾ തമ്മിലും രണ്ടടി അകലം നൽകുക. 

തടത്തിൽ വെള്ളം കെട്ടി നിൽക്കാതെ നോക്കുക. 

ആഴ്ചയിൽ ഒരിക്കൽ ഒരു ചെറിയ മേൽവളം നൽകുക. അടിവളമായി സെന്റൊന്നിന് 500ഗ്രാം ഫാക്ടംഫോസ്, 150ഗ്രാം പൊട്ടാഷ് എന്നിവ നൽകാം. ഒരു സെന്റിൽ 110 ചെടികൾ ഉണ്ടാകും എന്നോർക്കുക.ഇത്രയും വളങ്ങൾ അത്രയും തടങ്ങളിൽ ഭാഗിച്ചു ചേർക്കണം.

ചെടികൾ ഉയരം വയ്ക്കാൻ തുടങ്ങുമ്പോൾ കമ്പുകൾ കെട്ടി താങ്ങു നൽകണം. (Staking ).പ്ലാസ്റ്റിക് മൾച്ചിങ് ഉണ്ടെങ്കിൽ അതിൽ മുട്ടിക്കിടന്നാലും തെറ്റില്ല.

ഇലകളുടെ കക്ഷത്തിൽ നിന്നും മുളയ്ക്കുന്ന അനാവശ്യ ശിഖരങ്ങൾ ശ്രദ്ധയോടെ മുറിച്ചു മാറ്റുക.(Prunning ).

പ്രായമാകുന്ന ഇലകൾ അപ്പപ്പോൾ പറിച്ചു മാറ്റി നശിപ്പിക്കുക.(De leafing ).

പിന്നെ രോഗ കീടങ്ങൾ. 

അതുറപ്പായും വരും സർ. നെല്ല് പത്തായത്തിലുണ്ടെങ്കിൽ എലി വയനാട്ടിൽ നിന്നും വരുമെന്നല്ലേ കൃഷിഗീതയിൽ തോല മഹർഷി പറയുന്നത് 🤣.

പ്രധാന കീടങ്ങൾ യാരൊക്കെ? 

ചിത്ര കീടം (Leaf Miner )

കായ് തുരപ്പൻ പുഴു (Fruit Borer )

വെള്ളീച്ച (White Fly )etc 

രോഗങ്ങളോ? 

ബാക്റ്റീരിയൽ വാട്ടം 

Fungal വാട്ടം (Fusarium sp)

Damping off (തൈ അഴുകൽ )

Early Blight

Late Blight

പൊടിപ്പൂപ്പ് രോഗം 

ഇല ചുരുളൽ (വൈറസ് )

Spotted Wilt വൈറസ് 

കായ് അഴുകൽ...

 വൈറസ്സുകളുടെ ഒരു നീണ്ട നിര തന്നെ തക്കാളിയെ കാത്ത് നിൽക്കുന്നുണ്ട് രമണാ.. കണ്ണിൽ ഈർക്കിൽ വച്ച് കാത്തിരിയ്ക്കണം.

ഇപ്പോൾ മനസ്സിലായല്ലോ ഇവരിൽ നിന്നൊക്കെ രക്ഷപ്പെടുത്താൻ മരുന്നുകൾ ചില്ലറ ഒന്നുമായിരിക്കില്ല തക്കാളിയിൽ പ്രയോഗിക്കുന്നത് എന്ന്. 

ആയതിനാൽ അവർ (ആര്?   മ്മടെ സ്ഥിരം കുറ്റവാളികൾ...അയൽ സംസ്ഥാനക്കാർ🤣 ) ഒൻപത് തവണ മരുന്നടിച്ചു വളർത്തിക്കൊണ്ട് വരുന്ന തക്കാളി വാങ്ങി തിന്നുന്നതിനേക്കാൾ നല്ലത്, വേണ്ടി വന്നാൽ,  നമ്മൾ തന്നെ ഒരു വിവരമുള്ള പ്ലാന്റ് ഡോക്ടറുടെ ഉപദേശ പ്രകാരം  ഒന്നോ രണ്ടോ തവണ മരുന്നുകൾ ഉപയോഗിച്ച് തക്കാളി ഉണ്ടാക്കുന്നതാണ് എന്ന് ചുരുക്കം.

ജൈവ തീവ്രവാദം  (ക്ഷമിക്കണം ) ചിലപ്പോൾ തക്കാളിയിൽ ഫലിച്ചെന്നു വരില്ല  രമണാ... (എന്നെ അടിയ്ക്കേണ്ട.. പേടിപ്പിച്ചു വിട്ടാൽ മതി ). അല്ലെങ്കിൽ തക്കാളി,കൃഷി ചെയ്തിട്ടുള്ളവർ പറയട്ടെ.ഞാൻ ഈ വാദം പിൻ വലിയ്ക്കാം. അഭിപ്രായം ഇരുമ്പുലക്കയല്ലല്ലോ...

ഇല ചുരുളൽ രോഗം( Yellow Leaf Curl disease ) വന്നാൽ ഉടൻ തന്നെ ആ ചെടി പറിച്ചു മാറ്റിയേക്കണം. വൈറസ് മൂലമാണ്.അവിടെ നിർത്തി പരീക്ഷിക്കരുത്.പരീക്ഷിച്ചാൽ ഒന്നിന് പത്തേ, പത്തിന് നൂറേ എന്ന കണക്കിന് ബാക്കി ഉള്ളതും കൂടി പോകും.പറഞ്ഞേക്കാം. 

അങ്ങനെ കാര്യങ്ങൾ ഉദ്ദേശിച്ചത് പോലെ പുരോഗമിച്ചാൽ  പറിച്ചുനട്ട് 60-70 ദിവസം കഴിയുമ്പോൾ വിളവെടുപ്പ് തുടങ്ങാം. 

ചൂട് ഒരുപാടു കൂടുമ്പോൾ പൂക്കൾ കൊഴിയും.

പരാഗണം സ്വയം നടക്കും. ആരും സഹായിക്കേണ്ട രാവിലെ ചെടികൾ ചെറുതായി ഒന്ന് കുലുക്കി കൊടുത്താൽ ബഹുത് ഖുഷീ. 

കൃത്യമായി നനച്ചാൽ കായ് വിണ്ടു കീറുന്നത് ഒഴിവാക്കാം. കായ ആകുമ്പോൾ,  നിനച്ചിരിക്കാതെ ഒക്കെ മഴ പെയ്താൽ ചിലപ്പോൾ വിണ്ട് കീറാം.

കായ് പിടിക്കാൻ തുടങ്ങുമ്പോൾ ഒന്നോ രണ്ടോ തവണ ബോറോൺ അടങ്ങിയ Solubor 2ഗ്രാം/L ഇലകളിൽ സ്പ്രേ ചെയ്ത് കൊടുക്കാം.

പൂക്കുന്നതിന് മുൻപ്, ഒന്നോ രണ്ടോ തവണ ഇലകളിൽ സമ്പൂർണ പോലെയുള്ള സൂക്ഷ്മ മൂലക മിശ്രിതം(Micro nutrient Mixture ) തളിക്കുന്നതും നല്ലത് തന്നെ

വാൽക്കഷ്ണം: Heinz എന്ന കമ്പനിയുടെ Tomato Ketch up ന്റെ ഒരു പ്രധാന ഗുണമേന്മാസൂചകമായി കണക്കാക്കുന്നത് അത് കുപ്പിയിൽ നിന്നും പുറത്തേക്കു ഒഴുകുന്ന speed ആണ്. അത് 0.028 miles per hour ൽ ഒഴുക്ക് കൂടിയാൽ ആ lot കമ്പനി reject ചെയ്യും. ആ.. ആ.. ആജാ.. എന്ന ഒരു പരസ്യം ഓർമ വരുന്നുണ്ടോ? എന്താ ല്ലേ?

എന്നാൽ പിന്നെ താമസിക്കേണ്ട... വിത്ത് മേടിക്കാൻ ഒരുങ്ങിയാട്ടെ..

സുബീജം

സുക്ഷേത്രേ

ജായതേ

സമ്പദ്യതേ  എന്നാണല്ലോ... 

So be it... Amen... Happy Tomato Farming...

✍️പ്രമോദ് മാധവൻ