"എല്ലാത്തിനും ഒരു സമയമുണ്ട് ദാസാ" എന്നത് മലയാളി മറക്കാത്ത ഒരു ഡയലോഗ് ആണ്.
എന്ന് പറഞ്ഞ പോലെ ഓരോ കൃഷി ഇറക്കുന്നതിനും ഒരു നേരമുണ്ട്, കാലമുണ്ട്, ഞാറ്റുവേലയുമുണ്ട്. ഇന്നത് പ്രസക്തമല്ല എന്ന് വാദിക്കുന്നവരും ഏറെ. എങ്കിലും 'ആറ്റിൽ തൂവിലും അളന്ന് തൂവണം 'എന്ന് പണ്ടാരാണ്ട് പറഞ്ഞ പോലെ ഏത് കൃഷി തുടങ്ങുന്നതിനു മുൻപും ശ്രദ്ധിക്കേണ്ട ചില കാര്യങ്ങൾ ഉണ്ട്.
അതിൽ പ്രധാനമാണ് വിള ആസൂത്രണം (Crop Planning).
നന്നായി വിളവ് തരാനും കീട രോഗങ്ങൾ കുറഞ്ഞിരിക്കാനും നല്ല ആസൂത്രണം സഹായിക്കും.
കാലാവസ്ഥാ വ്യതിയാനത്തിന്റെ ഈ ദുർഘടകാലത്ത് അതിനെ നമുക്ക് Climate Smart Agriculture എന്നോ Climate Resilient Farming എന്നോ ഒക്കെ വിളിക്കാം.
" കാലം നോക്കി കൃഷി
മേളം നോക്കി ചാട്ടം "എന്നാണല്ലോ
ഓരോ വിളകൾ ഇറക്കാൻ പറ്റിയ നല്ല കാലങ്ങൾ (season) ഏതൊക്കെ ആണെന്ന് നോക്കാം.
നെൽകൃഷിക്ക് കാലം മൂന്ന്. വിരിപ്പ്, മുണ്ടകൻ, പുഞ്ച.
പച്ചക്കറി കൃഷിക്കും കാലം മൂന്ന്. വർഷകാല(Monsoon)കൃഷി, ശീതകാല(Winter) കൃഷി, വേനൽക്കാല(Summer) കൃഷി
മെയ് മുതൽ ഒക്ടോബർ വരെ മഴക്കാല കൃഷി എന്ന് പറയാം. മെയ് മാസത്തിൽ നടീൽ തുടങ്ങിയാൽ ശക്തമായ മഴ വരുമ്പോഴേക്കും ചെടികൾ നിലയുറപ്പിക്കും.
നവംബർ മുതൽ ജനുവരി വരെ ശീത കാല കൃഷി. അതിന് ശേഷം രാത്രി താപനില കൂടാൻ തുടങ്ങും.
ഫെബ്രുവരി മുതൽ ഏപ്രിൽ വരെ വേനൽക്കാല കൃഷി. പകലും രാത്രിയും ചൂട് തന്നെ. ജലസേചന സൗകര്യം ഉണ്ടെങ്കിൽ കൃഷി പൊളിക്കും. പ്രത്യേകിച്ചും വയലുകളിൽ.
സീസണൽ ആയ ഈ മാറ്റങ്ങൾക്ക് അനുസൃതമായി നിലം ഒരുക്കണം. മഴക്കാലത്ത് പണ/വാരം (Raised beds) ആണ് നല്ലത്.മഴക്കാല കൃഷിയിൽ നീർ വാർച്ച (drainage) മുഖ്യം. ഇല്ലെങ്കിൽ, പണി പാലും വെള്ളത്തിൽ കിട്ടും
മഞ്ഞുകാലത്തും വേനലിലും തടം/ചാൽ (Pits /Furrows) എന്നിവയാണുചിതം.
നീരൂറ്റികളായ കീടങ്ങൾ (Sucking pests നവംബർ മുതൽ കൂടിക്കൂടി, മെയ് മാസം വരെ ഉണ്ടാകും.ആയതിനാൽ ശീത-വേനൽ കാല കൃഷികളിൽ ആരംഭത്തിൽ തന്നെ മഞ്ഞക്കെണി, നീലക്കെണി എന്നിവ നിർബന്ധമായും സ്ഥാപിക്കണം. അത് ചെടിയുടെ ഇലചാർത്തിന്റെ മുകളിൽ ആയിരിക്കുകയും വേണം. (പലരും അത് പന്തലിൽ തൂക്കിയിടുന്നതായിട്ടാണ് കാണുന്നത്.) ആക്രാന്തി മൂത്ത് ദൂരെ നിന്നും വരുന്ന കീടത്തിന്റെ ശ്രദ്ധയിൽ ആദ്യം പതിയേണ്ടത് മഞ്ഞ നിറമായിരിക്കണം, യേത്..).
ധനു മാസം.. നന കിഴങ്ങ് നടാം
മകരം... ഓണത്തിനുള്ള ചേന, ഇഞ്ചി, ചേമ്പ് കൃഷി, വിഷുവിനുള്ള വെള്ളരി കൃഷി. വള്ളിയായി വളരുന്ന കിഴങ്ങ് വർഗ വിളകൾക്കും മകരം തന്നെ പഥ്യം. 'മകരത്തിൽ മരം കയറണം 'എന്നാണ്.
കുംഭ മാസം.... ചേന കൃഷി,(മകരത്തിൽ നട്ടില്ലെങ്കിൽ കാച്ചിൽ, കിഴങ്ങ് എന്നിവ കുംഭത്തിൽ നടാം).
മേടം... ഇഞ്ചി കൃഷി, മരച്ചീനി, പൊടി വാഴ.
മേടപ്പത്ത് ... തെങ്ങ് നടീൽ
ഇടവം... ചേമ്പ്, മഞ്ഞൾ, കൂവ, മുളക്, വഴുതന, കുമ്പളം, കുരുമുളക്.
മിഥുനം... കൂർക്ക, ചതുര പയർ, അമര പയർ.
വൃശ്ചികം... തണ്ണി മത്തൻ, പൊട്ടു വെള്ളരി, ഓണ വാഴ, ശീതകാല പച്ചക്കറികൾ
ധനു... ശീതകാല പച്ചക്കറികൾ, വെള്ളരി വർഗ വിളകൾ.
ഇങ്ങനെ പോകുന്നു.
അസമയത്തുള്ള (Off season planting) കൃഷി റിസ്ക് ആണ്. കീട രോഗങ്ങൾ കൂടുതൽ ആയിരിക്കും. മഴയുടെ, ചൂടിന്റെ,കൂടുതൽ- കുറവുകൾ കൃഷിയെ ദോഷകരമായി ബാധിച്ചേക്കാം.
ഓരോ കൃഷി ചെയ്യുമ്പോഴും അതിന് വന്നേക്കാവുന്ന രോഗ -കീടങ്ങളുടെ ഒരു ലിസ്റ്റ് മുൻകൂട്ടി തയ്യാറാക്കി, അത് പ്രതിരോധിക്കുവാൻ ചെയ്യേണ്ട കാര്യങ്ങൾ ഉൾപ്പെടുന്ന ഒരു പാക്കേജ് സ്വയം തയ്യാറാക്കണം.
ഇനങ്ങളുടെ
രോഗ പ്രതിരോധ ശേഷിയെ അടിസ്ഥാനമാക്കി വേണം നടാനായി തെരഞ്ഞെടുക്കാൻ.
വാണിജ്യ കൃഷിയിൽ പ്രാദേശിക വിപണിയിലെ ആ ഇനത്തിന്റെ സ്വീകാര്യതയും നോക്കണം.
പാവലിനം തെരെഞ്ഞെടുക്കുമ്പോൾ അതിന്റെ നിറം, വലിപ്പം, മുള്ള് കൂർത്തതോ പരന്നതോ എന്നതൊക്കെ ആ ഉത്പന്നത്തിന്റെ സ്വീകാര്യത നിശ്ചയിക്കുന്നതിൽ പ്രധാനമാണ്. പയർ, വഴുതന എന്നിവയിൽ ഒക്കെ നിറം വളരെ പ്രധാനമാണ്.
സ്ഥലം തെരെഞ്ഞെടുക്കൽ(Site Selection)
നിലം ഒരുക്കൽ (Land Preparation)
കുമ്മായ പ്രയോഗം (Liming)
ശുപാർശ ചെയ്യപ്പെട്ട ജൈവ-രാസ -ജീവാണു വളങ്ങൾ മതിയായ അളവിൽ പ്രയോഗിക്കണം. (Integrated Nutrient Management).
ട്രൈക്കോഡെർമ്മയാൽ സമ്പുഷ്ടമാക്കപ്പെട്ട ചാണകപ്പൊടി -വേപ്പിൻ പിണ്ണാക്ക് മിശ്രിതം തന്നെ അടിസ്ഥാന വളമായി (അടി വളമായി) ഉപയോഗിക്കണം. (പ്രത്യേകിച്ചും പയർ, തക്കാളി, വഴുതന, മുളക്, ഇഞ്ചി, കുരുമുളക് എന്നിവയിൽ). കാരണം ഇവരെ വിടാതെ പിന്തുടരുന്ന ചില ബാക്റ്റീരിയകളും ഫംഗസ്സുകളും ഉണ്ട്. വാട്ടവും ചീയലും (Wilting & Rotting) ഉണ്ടാക്കുന്ന ക്രിമിനൽസ്.Pythium, Phytophthora, Ralstonia എന്നിവർ.
സ്യൂഡോമോണസ്, ജീവാണു വളങ്ങൾ എന്നിവയുടെ ഉപയോഗം ശീലമാക്കാം. PGPR, VAM എന്നിവയെക്കുറിച്ച് കർഷകൻ നന്നായി മനസ്സിലാക്കണം.
കൃഷി വകുപ്പിന്റെ ടോൾ ഫ്രീ നമ്പർ ആയ 1800 180 1551 ൽ വിളിക്കൂ.. സംശയങ്ങൾ തീർക്കൂ..എല്ലാവരും ഫോണിൽ ഈ നമ്പർ സേവ് ചെയ്യൂ..
വിളക്ക് കെണി (Light Trap)
ഫിറോമോൺ കെണി
പവർ ബാറ്റ് പ്രയോഗം (കീടങ്ങളെ കൊല്ലാൻ)
രണ്ടാഴ്ചയിൽ ഒരിക്കൽ വേപ്പെണ്ണ -വെളുത്തുള്ളി -ബാർ സോപ്പ് മിശ്രിതം ഇലകളിൽ
തുളസിക്കെണി, പഴക്കെണി...
ഇങ്ങനെ ആവനാഴിയിലെ എല്ലാ അസ്ത്രങ്ങളും ഈ പടപ്പുറപ്പാടിൽ ഭാവനാത്മകമായി വിന്യസിക്കണം. (മീശ മാധവൻ സിനിമയിൽ, മാധവനെ കുടുക്കാൻ ഭഗീരഥൻ പിള്ളയുടെ മകൾ ചെയ്ത കാര്യങ്ങൾ സ്മരിക്കുക.)
ഓർക്കുക... നമുക്ക് എത്ര രുചികരമാണോ പഴം പച്ചക്കറികൾ, അതിന്റെ പതിന്മടങ്ങ് ഇഷ്ടമാണ് കീടങ്ങൾക്ക് അവയെ. മാത്രമല്ല കീടങ്ങൾ Host specific ആണ്. വെണ്ടയുടെ ഇലചുരുട്ടിപുഴു വെണ്ടയിലയോ അതിന്റെ കുടുംബത്തിൽ പെടുന്ന ചെമ്പരത്തിയുടെ ഇലയോ മാത്രമേ തിന്നൂ.. അടുത്ത് നല്ല പൊളപ്പൻ വ്ലാത്താങ്കര ചീര നിന്നാലും ഞമ്മക്ക് മാണ്ട.. മനസ്സിലായോ?
അവർ ഉപവാസത്തിനും തയ്യാറല്ല. ഇഷ്ട ഭക്ഷണം കിട്ടാൻ എന്ത്‌ റിസ്ക്കും എടുക്കും. ജീവൻ വരെ കളയും. ബീവറേജ്‌സ് ഔട്ട്ലെറ്റ് ഏത് കുണ്ടാം കുടുക്കിൽ കൊണ്ട് പോയി വച്ചാലും പേഷ്യൻറ്സ് (ഞങ്ങൾ സർക്കാർ ഉദ്യോഗസ്ഥരുടെ അന്നദാതാക്കൾ)അവിടെ ഇഴഞ്ഞും വലിഞ്ഞും ഓട്ടോ പിടിച്ചും വരുന്നത് കണ്ടിട്ടില്ലേ? അത് പോലെയാണ് കീടങ്ങൾ. ഇഷ്ടപ്പെട്ട ഭക്ഷണം കിട്ടാൻ ചാകാനും തയ്യാർ..
അപ്പോൾ, ഇനി കൃഷി കാലം നോക്കി മാത്രം.
വാൽകഷ്ണം : വിളകൾ അസമയത്ത് (off season) ഉൽപ്പാദിപ്പിക്കാൻ കഴിഞ്ഞാൽ നല്ല വില കിട്ടാൻ സാധ്യത ഉണ്ട്. പക്ഷെ ഇരട്ടി ശ്രദ്ധ വേണ്ടി വരും. കാബേജ്, കോളിഫ്ലവർ എന്നിവ ശീതകാലത്ത് മാത്രം അല്ല ഉണ്ടാകുക.ശ്രമിച്ചാൽ അല്ലാത്ത സമയത്തും വിളയും.
തക്കാളി ഓഫ് സീസണിൽ ഉൽപ്പാദിപ്പിക്കുമ്പോൾ നല്ല വില കിട്ടും. പക്ഷെ സീസൺ ആകുമ്പോൾ വില തകർന്നടിയും. തക്കാളി കൃഷി ആഗസ്റ്റ്‌ അവസാനത്തോടെ തുടങ്ങാം. ഗംഭീര വിളവ് കിട്ടും. പക്ഷെ വില 15-20 രൂപയിലേക്ക് ഇടിഞ്ഞുതാഴും.
✍🏻 പ്രമോദ് മാധവൻ
