മഞ്ഞള്‍പ്പൊടി - സോഡാപ്പൊടി - പാല്‍ക്കായം മിശ്രിതം: (കീടങ്ങൾക്ക് നോ എൻട്രി!)

മഞ്ഞൾപ്പൊടി, സോഡാപ്പൊടി (അപ്പക്കാരം), പാൽക്കായം (ശുദ്ധമായ കായം) എന്നിവ ചേർത്ത മിശ്രിതം കൃഷിയിൽ മികച്ചൊരു ജൈവ കീട/കുമിൾനാശിനി ആയി ഉപയോഗിക്കുന്നു. ഇതിൽ, ആന്റിസെപ്റ്റിക്, ആന്റിഓക്സിഡന്റ് ഗുണങ്ങളുള്ള മഞ്ഞൾപ്പൊടി കീടങ്ങളെയും കുമിളുകളെയും പ്രതിരോധിക്കാൻ സഹായിക്കുന്നു. സോഡാപ്പൊടിക്ക്  പൗഡറി മിൽഡ്യൂ പോലുള്ള കുമിൾ രോഗങ്ങളെ നിയന്ത്രിക്കാനുള്ള പ്രത്യേക ശേഷിയുണ്ട്. ഈ മിശ്രിതത്തിലെ മറ്റൊരു പ്രധാന ഘടകമായ പാൽക്കായം, സാധാരണയായി കറികളിൽ ചേർക്കുന്ന കായത്തിന്റെ ശുദ്ധവും വീര്യമേറിയതുമായ കറ (Resin) രൂപമാണ്. ഇതിന്റെ രൂക്ഷഗന്ധം കീടങ്ങളെ ചെടികളിൽ നിന്ന് അകറ്റി നിർത്താൻ സഹായകമാവുന്നുണ്ടു. പാൽക്കായം പലപ്പോഴും ആയുർവേദ ഔഷധങ്ങൾക്കും മറ്റു വ്യാവസായിക ആവശ്യങ്ങൾക്കും ആണ് സാധാരണ ഉപയോഗിക്കുന്നത് , അതുവഴി ഈ മൂന്ന് ചേരുവകളും ഒത്തുചേർന്ന് ചെടികൾക്ക് പൂർണ്ണമായ സംരക്ഷണം നൽകുന്നു.

ഈ ജൈവമിശ്രിതം തക്കാളി, മുളക് തുടങ്ങിയ ചെടികളിൽ കണ്ടുവരുന്ന ഇലപ്പുള്ളി രോഗം, പൗഡറി മിൽഡ്യൂ എന്നിവ നിയന്ത്രിക്കാൻ ഏറെ ഫലപ്രദമാണ്. രോഗലക്ഷണങ്ങൾ കണ്ടുതുടങ്ങുമ്പോൾത്തന്നെ 5 മുതൽ 7 ദിവസം ഇടവിട്ട് തളിക്കുന്നത് രോഗം പടരുന്നത് തടയാൻ സഹായിക്കും. വെണ്ട പോലുള്ള ചെടികളിൽ തുരുമ്പുരോഗം പ്രതിരോധിക്കുന്നതിനായി, തൈകൾ നട്ട് രണ്ടാഴ്ച കഴിയുമ്പോൾ ഒരു പ്രതിരോധ നടപടിയായി മാസത്തിലൊരിക്കൽ തളിക്കുന്നത് ഉചിതമാണ്. പയർ ചെടികളിൽ കീടങ്ങൾ വഴി രോഗം പടരുന്നത് തടയാൻ പാൽക്കായത്തിന്റെ രൂക്ഷഗന്ധം സഹായകമാവുന്നു. എന്നാൽ, ഇലക്കറികളിൽ (ചീര പോലുള്ളവ) വിളവെടുപ്പിന് തൊട്ടുമുമ്പുള്ള 3-4 ദിവസങ്ങളിൽ ഈ മിശ്രിതം തളിക്കുന്നത് ഒഴിവാക്കണം. വെള്ളീച്ച, ഇലപ്പേൻ, മുഞ്ഞ മറ്റു  ഇലകളിൽ വന്നിരുന്ന് ഉപദ്രവമുണ്ടാക്കുന്ന പലതരം ചെറിയ പ്രാണികൾ, വണ്ടുകൾ എന്നിവയെ അകറ്റി നിർത്താനും ഇത് പ്രയോജനപ്പെടുന്നുണ്ട്.

ജൈവ കീടനാശിനി മിശ്രിതം തയ്യാറാക്കുന്ന വിധം:

********************************

ഒരു ലിറ്റർ വെള്ളത്തിൽ ഏകദേശം 5 ഗ്രാം അല്ലെങ്കിൽ ഒരു ടീസ്പൂൺ സോഡാപ്പൊടി (അപ്പക്കാരം), 5 ഗ്രാം മഞ്ഞൾപ്പൊടി എന്നിവ ചേർത്ത് നന്നായി ഇളക്കുക. ഇതിലേക്ക് 10 ഗ്രാം പാൽക്കായം അല്പം ചൂടുവെള്ളത്തിൽ (100 മില്ലി) എടുത്ത് നന്നായി ലയിപ്പിക്കുക. കട്ടയില്ലാതെ ലയിപ്പിക്കാൻ ശ്രദ്ധിക്കുക. അതിലേക്ക്  5-10 മില്ലി ലിക്വിഡ് സോപ്പ് അല്ലെങ്കിൽ നേർത്ത ഡിറ്റർജന്റ് എന്നിവ കൂടി ചേർത്ത് ലായനി നന്നായി  യോജിപ്പിക്കുക . സോപ്പ് ചേർക്കുന്നത്, തയ്യാറാക്കിയ ലായനി ചെടികളുടെ ഇലകളിൽ നന്നായി ഒട്ടിപ്പിടിക്കാനും സംരക്ഷണം ഉറപ്പാക്കാനും സഹായിക്കും.

ചെടികളിൽ പ്രയോഗിക്കേണ്ട രീതി:

**************************************

രോഗം ബാധിച്ച ചെടികളുടെ ഇലകളുടെ മുകളിലും അടിയിലും നന്നായി നനയുംവിധം തളിക്കുക. പ്രത്യേകിച്ച് ഇലയുടെ അടിവശത്ത് തളിക്കാൻ ശ്രദ്ധിക്കണം. 

ഈ ജൈവ ലായനി ചെടികളിൽ പ്രയോഗിക്കാൻ ഏറ്റവും അനുയോജ്യമായ സമയം വൈകുന്നേരമാണ്. ശക്തമായ സൂര്യപ്രകാശത്തിൽ സ്പ്രേ ചെയ്യുന്നത് ഇലകൾ കരിഞ്ഞുപോകാൻ  സാധ്യതയുണ്ട്.. 

രോഗത്തിന്റെ തീവ്രത അനുസരിച്ച്, 5 മുതൽ 7 ദിവസം ഇടവിട്ട് തളിക്കുന്നത് ഫലം കൂട്ടാൻ സഹായിക്കും. 

മഴ പെയ്യുകയാണെങ്കിൽ, ലായനി ഒഴുകിപ്പോകാൻ സാധ്യതയുണ്ട്. അത്തരം സന്ദർഭങ്ങളിൽ മഴ മാറിയ ശേഷം വീണ്ടും സ്പ്രേ ചെയ്യുന്നത് നല്ലതാണ്.

ശ്രദ്ധിക്കേണ്ട കാര്യങ്ങൾ:

***************************

മിശ്രിതത്തിലെ ഏതെങ്കിലും ചേരുവയുടെ അളവ്, പ്രത്യേകിച്ച് സോഡാപ്പൊടിയുടെ (അപ്പക്കാരം) അളവ്, ശുപാർശ ചെയ്തതിലും അധികമായാൽ ചെടികളുടെ ഇലകൾ കരിഞ്ഞുപോകാൻ സാധ്യതയുണ്ട്.

പുതിയ ചെടികളിൽ പ്രയോഗിക്കുന്നതിനു മുൻപ്, ഒരു ചെറിയ ഭാഗത്ത് മാത്രം തളിച്ച് 24 മണിക്കൂറിന് ശേഷം ചെടിക്ക് വാട്ടമോ മറ്റ് പ്രശ്നങ്ങളോ ഇല്ലെന്ന് ഉറപ്പുവരുത്തിയ ശേഷം മാത്രം മുഴുവൻ ചെടിയിലും തളിക്കുക.

ലായനി തയ്യാറാക്കിയ ശേഷം ഉടൻ തന്നെ ഉപയോഗിക്കാൻ ശ്രമിക്കുക. അധിക സമയം വെക്കുന്നത് ഫലപ്രാപ്തി കുറയ്ക്കാൻ സാധ്യതയുണ്ട്.

ഈ മുൻകരുതലുകൾ പാലിക്കുന്നത് വഴി, ചെടികൾക്ക് യാതൊരു ദോഷവും വരുത്താതെ ഈ ജൈവ മിശ്രിതത്തിന്റെ പൂർണ്ണമായ ഗുണങ്ങൾ നിങ്ങൾക്ക് നേടാൻ സാധിക്കും.