'കായേം ചേനേം മുമ്മാസം
ചക്കേം മാങ്ങേo മുമ്മാസം
താളും തകരേം മുമ്മാസം
അങ്ങനേം ഇങ്ങനേം മുമ്മാസം'
ഇതായിരുന്നു ഒരു കാലത്ത് അർദ്ധ പട്ടിണിക്കാരനായ മല്ലുവിന്റെ മൃത്യുഞ്ജയ മന്ത്രം.
പഞ്ഞക്കർക്കടകം, കള്ളക്കർക്കടകം എന്നിങ്ങനെ ഓർമ്മകളിൽ വറുതിയുടെ സ്മരണകൾ ഉയർത്തുന്ന മാസം.
വറുതിയുടെ (അന്തക്കാലത്ത് ) ഈ മാസം തന്നെയാണ് പുണ്യമാസമായി ഹിന്ദുക്കൾ കരുതുന്നത്. രാമായണ മാസം.
പിതൃ(സർവ്വനാമമായി ഉപയോഗിച്ചിരിക്കുന്നു ) സ്മരണകൾ ഉണർത്തുന്ന കർക്കടക വാവ്ബലിയും ഈ മാസം തന്നെ.ജന്മാന്തരങ്ങളിലൂടെ പകർന്ന് കിട്ടിയ ജനിതക സമ്പത്തി(DNA) ന് പിൻതലമുറകൾ പൂർവ്വസ്സൂരികൾക്ക് ആദരവ് നൽകുന്ന മാസം.(നൻറി വേണം നൻറി.. 🤣)
യമധർമ്മൻ, ചിത്രഗുപ്തന്റെ സഹായത്തോടെ തന്റെ വാർഷിക ടാർഗറ്റ് തികയ്ക്കുന്ന സമയം എന്ന് തമാശ പറയാറുണ്ട് .കാലവർഷത്തിന്റെ കാർക്കശ്യം കൊണ്ടും,വറുതി മൂലമുള്ള പൊറുതിമുട്ട് കൊണ്ടും വൃദ്ധജനങ്ങൾ കൂടുതലായി യമലോകം പൂണ്ടിരുന്നത് പണ്ട് ഈ മാസത്തിലായിരുന്നുവെന്നതാകാം കാരണം.
ചക്കയുടെയും മാങ്ങയുടെയും സീസൺ ഒക്കെ കഴിഞ്ഞ്, പ്രത്യേകിച്ചൊന്നും വിളവെടുക്കാൻ ഇല്ലാത്ത മാസം. എന്നാൽ വരാൻ പോകുന്ന പൊന്നിൻ ചിങ്ങത്തെ പ്രതീക്ഷയോടെ കാത്തിരിക്കാൻ പ്രേരിപ്പിക്കുന്ന മാസം.ഹോ.. പണ്ട് കാലത്ത് അതിന്റെയൊക്കെയൊരു സുഖം പറയാവതല്ലേ...
പല കാരണങ്ങൾ കൊണ്ടും ശരീരത്തിന്റെ ബലം കുറയുന്ന സമയമാണിത്. അത് കൊണ്ട് തന്നെ ആരോഗ്യ സംരക്ഷണമാസം കൂടിയാണിത്.
കയ്യിൽ പത്ത് പുത്തനുള്ളവർക്കിത് സുഖചികിത്സയുടെ കാലം.അല്ലെങ്കിൽ പിന്നെ നമുക്ക് വേണ്ടി 'കഷ്ടപ്പെട്ട്' പണിയെടുക്കുന്ന മുന്തിയ ജനപ്രതിനിധി ആകണം. അപ്പോൾ സർക്കാർ ചെലവിൽ കാര്യം നടക്കും😀.
ദഹനശേഷിയും രോഗപ്രതിരോധ ശേഷിയും കുറയുന്ന സമയം ആയതിനാൽ തന്നെ അധ്വാനവർഗ്ഗത്തിന് ശരീരം സ്വാസ്ഥ്യത്തോടെ നില നിർത്തേണ്ട ദിവസങ്ങൾ.ഒരു ദിവസം പണി മുടങ്ങിയാൽ ചില്ലറയല്ല സാമ്പത്തിക നഷ്ടം.
ഈ ദിവസങ്ങളിൽ പത്തിലക്കറിയും ഔഷധക്കഞ്ഞിയും എണ്ണതേച്ചുകുളിയുമൊക്കെ ഏറെ നന്ന് എന്ന് ആയുർവേദം പറയുന്നു.
' ഔഷധം ആഹാരം പോലെ 'വാങ്ങി വിഴുങ്ങുന്ന കാലത്ത് 'ആഹാരം തന്നെയാണ് ഔഷധം' എന്ന് നമ്മളെ ഇനി ആരാണ് പഠിപ്പിക്കേണ്ടത്?
*ഒരു ചെടിയും പാഴല്ല* എന്ന് പ്രകൃതി നമ്മെ പഠിപ്പിക്കുന്നു. മണ്ണിൽ നിന്നും ജലവും ലവണങ്ങളും,അന്തരീക്ഷത്തിൽ നിന്നും കാർബണും ജീവവായുവും, ആകാശത്തു നിന്നും കോസ്മിക് എനർജിയും സങ്കലിപ്പിക്കുന്ന ഏത് ചെടിയും, ഒരല്പം വിവേചനബുദ്ധിയോടെ ഭൂജിക്കുന്നതിൽ പേടിക്കേണ്ട കാര്യമുണ്ടോ മരണാ?
ഒരല്പം രുചിയും, നമ്മെ മടുപ്പിക്കാത്ത മണവും ഉണ്ടെങ്കിൽ തൊടിയിലെ ഏത് ചെടിയും ഭക്ഷണമാക്കാം. അങ്ങനെ ആണല്ലോ നമ്മുടെ ആടുമാടുകൾ ഒക്കെ നിലനിന്ന് പോരുന്നത്.
പുറം രാജ്യങ്ങളിൽ നിന്നും പണം വരാൻ പാങ്ങില്ലാത്ത ഭൂതകാലകർക്കടകങ്ങളിൽ നമ്മുടെ ദരിദ്രനാരായണന്മാരുടെ ജഠരാഗ്നി ശമിപ്പിച്ചതിൽ ഒരു പങ്ക്,തൊടിയിലെ ഇലച്ചെടികൾ തന്നെ.
യേശുദാസിന്റെ (തരംഗിണിയുടെ )പോന്നോണ തരംഗിണി എന്ന ഗാനസമാഹാരത്തിൽ 'ഇല്ലക്കുളങ്ങരെയിന്നലെയന്തിയ്ക്കൊരിത്തിരി പൂമുല്ല മൊട്ടിട്ടു... എന്നൊരു ഗാനമുണ്ട്. അത് കേൾക്കുന്നത് തന്നെ ഒരു സുഖം
അതിനിടയിൽ 'താളും തകരയും പൂക്കും തൊടിയില്... എന്നൊക്കെ വരുന്നുണ്ട് . അതേ മലയാളിയുടെ ഗൃഹാതുരത്വം തന്നെയാണ് തൊടിയിലെ പച്ചിലകൾ.. സ്വാസ്ഥ്യത്തിന്റെയും ദീർഘായുസ്സിന്റെയും അനംഗ മന്ത്രങ്ങൾ...
എല്ലാക്കാലത്തും കഴിക്കാവുന്ന, അല്ലെങ്കിൽ കഴിക്കേണ്ട ഭക്ഷണമാണ് ഇലക്കറികൾ.
ആനയ്ക്ക് പനമ്പട്ട പോലെ, പശുക്കൾക്ക് പച്ചപ്പുല്ലു പോലെ, ആടിന് പ്ലാവില പോലെ, മനുഷ്യർ നിത്യവും ഇലക്കറികൾ കഴിക്കണം. അത് കുടലിന്റെ ചലന ശക്തി വർധിപ്പിക്കുന്നു. അതിലുള്ള, ദഹിക്കുന്നതും(digestible fibres ) ദഹിക്കാത്തതും(resistant fibres ) ആയ നാരുകൾ കുടലിൽ കെട്ടി നില്ക്കാൻ സാധ്യത ഉള്ള വിഷാoശത്തെ താമസം വിനാ പുറത്തേക്ക് തള്ളുന്നു.
ഇലക്കറികൾ വിസ്സർജ്യത്തിന് ശരിയായ മാർദ്ദവം നൽകി, ദഹന വ്യൂഹത്തിന്റെ അധോഭാഗങ്ങളെ ക്ഷതമേൽക്കാതെ കാക്കുന്നു.
ദേശീയ ഭക്ഷണമായ പൊറോട്ടയും സാഹസികമായ സാഹചര്യങ്ങളിൽ മുറിച്ചെടുത്ത, തണുത്തുറഞ്ഞ, 'ring of fire ' പിറ്റേന്ന് രാവിലെ ഓർമ്മിപ്പിക്കാൻ തക്കവണ്ണം മുളകും മസാലയും ചേർത്ത് 'ഒലത്തിയ ' ബീഫും കഴിച്ച്, ശരീരത്തിന്റെ അധോഭാഗ അസ്കിതകൾ 'മൂലം '(🤣) കഷ്ടപ്പെടുന്ന മലയാളികൾ എത്രയെങ്കിലുമുണ്ട് എന്ന് ഡോക്ടർമാർ സാക്ഷ്യപ്പെടുത്തുന്നു. 'പൊറോട്ട' മൂലം പഴകിയ 'ബീഫ് 'മൂലം, മരണം പലവിധമുലകിൽ സുലഭം 'എന്ന് പാടേണ്ടി വരുന്ന കാലവും കൂടിയാകുന്നു ഇക്കാലം.
. ഒരു പ്രായം കഴിഞ്ഞാൽ വർഷത്തിൽ ഒരിക്കൽ എങ്കിലും colo -rectal examinathion നടത്തേണ്ടത് ഒരനിവാര്യതയാകുന്ന കാലം.
അങ്ങനെ നോക്കുമ്പോൾ പത്തരമാറ്റുള്ള ഭക്ഷണങ്ങൾ തന്നെ ആണ് പച്ചിലകൾ.
സ്വാസ്ഥ്യത്തെ കുറിച്ച് അവബോധമുള്ള ഏത് ജനതയുടെ ഭക്ഷണ രീതി പരിശോധിച്ചാലും അവരെല്ലാം വലിയ പ്രാധാന്യം പച്ചിലകൾക്ക് നൽകുന്നതായി കാണാം. ഭക്ഷണത്തിന് വിശ്വാസപരമായും ആചാരപരമായും ഉള്ള ചില നിബന്ധനകൾ നൽകിയിരിക്കുന്നത് ആ 'ഭക്ഷണ സുശീല'(Good Food Habits ) ങ്ങളിൽ നിന്നും വ്യതിചലിച്ചു പോകാതിരിക്കാൻ ആകുമെന്ന് കരുതാം.
'കർക്കടകം കഴിഞ്ഞാൽ ദുർഘടം കഴിഞ്ഞു, കർക്കിടകത്തിൽ പത്തില തിന്നണം, കർക്കടകത്തിൽ പട്ടിണി കിടന്നത് പുത്തരി കഴിഞ്ഞാൽ മറക്കരുത്, കർക്കടകചേന കട്ടിട്ടായാലും കൂട്ടണം, കർക്കടകത്തിൽ പത്തുണക്ക്, കർക്കടകത്തിലെ കറുത്ത വാവിന് കരിമ്പോത്തിന്റെ തുട വിറയ്ക്കും എന്നിങ്ങനെ നിരവധി ചൊല്ലുകൾ കർക്കിടകവുമായി ബന്ധപ്പെട്ടുണ്ട്. ആൾ മോശക്കാരനല്ല എന്ന് ചുരുക്കം.
'കർക്കടകത്തിലെ കുശവനെ' (വെയിൽ ഇല്ലാതെ 'മൺ ശില്പി'യ്ക്കെന്ത് പണി?) പോലെ മറ്റ് പുറം പണികൾ ഒന്നും ചെയ്യാനാകാതെ പെരയ്ക്കകത്തു ഇരിക്കേണ്ടി വരുമ്പോൾ, ദേഹരക്ഷയ്ക്ക് ഉള്ള കാര്യങ്ങൾ ചെയ്യുക തന്നെ കരണീയം. ഈശ്വര വിശ്വാസത്തോടെ, പിതൃക്കളെ നന്ദിയോടെ സ്മരിച്ച്‌,വരാൻ പോകുന്ന നല്ല കാലത്തെ സ്വപ്നം കണ്ടിരിക്കുകയായിരുന്നു ഒരു കാലത്ത് കർക്കടകത്തിൽ ഒരു ശരാശരി മലയാളിയുടെ പഴക്കം.
കൊല്ലാവസാനം(മലയാളം കലണ്ടർ പ്രകാരം ) വിശ്രമത്തിന്റെ നാളുകൾ.
ആ സമയത്ത് വീട്ടിൽ സൂക്ഷിച്ച് വച്ചിരിക്കുന്ന ചക്കക്കുരുവും ആഞ്ഞിലിക്കുരുവും കശുവണ്ടിയുമൊക്കെ ചുട്ടുതിന്നുന്ന കാലം. ഉരുക്കിയ ശർക്കരയിൽ ഉണക്കത്തവിട് ചേർത്ത് കുഴച്ചു പരത്തി ചട്ടിയിൽ തവിടപ്പം ചുറ്റെടുത്ത് രുചിയോടെ കഴിച്ച നാളുകൾ ഇന്നത്തെ 'പിസ്സ -മന്തി ഭോജി' കൾക്കറിയുമോ ആവോ?
യൂറോപ്യനും ജപ്പാൻകാരനും ചൈനക്കാരനും, എന്തിന് തമിഴനും തെലുങ്കനും കഴിക്കുന്നത്ര ഇലക്കറികൾ ഒരു ശരാശരി മലയാളി കഴിക്കുന്നുണ്ടോ? അതും പോട്ടെ പത്തിലക്കറി ഉണ്ടാക്കാൻ ഉള്ള പത്ത് ചെടികൾ തികച്ചെടുക്കാൻ ഇന്ന് എത്ര വീടുകളിൽ ഉണ്ടാകും?
പ്രിയ കവി വി.മധുസൂദനൻ നായർ പാടിയപോലെ 'ബ്രഹ്മിയും കുപ്പ, ക്കൊടിത്തൂവയും തേടി അഗ്നിവേശൻ നീല വിണ്ണ് ചുറ്റുന്ന'കാലം.. കലികാലം.
നെയ്യുരുണി, താള്, തകര, കുമ്പളം, മത്തൻ, വെള്ളരി, ആന കൊടിത്തൂവ, ചീര, ചേന, ചേമ്പില എന്നിവയാണ് പൊതുവേ പത്തിലകൾ ആയി കണക്കാക്കുന്നത്. (അതിൽ ചില പാഠഭേദങ്ങൾ കാണാറുണ്ട്.).
കൂടാതെ പറമ്പുകളിൽ ഒരു കാലത്ത് സുലഭമായിരുന്ന തഴുതാമ, മുള്ളൻ ചീര, സാമ്പാർ ചീര, പയറിന്റെ ഇല, ചങ്ങലം പരണ്ട എന്നിവയൊക്കെ കറികളിൽ ഒരല്പം ചേർത്ത് കഴിക്കാവുന്നതാണ്. കുട്ടികളെക്കൊണ്ട് കഴിപ്പിക്കുന്നതിനായി ഇവയൊക്കെ,അടയുണ്ടാക്കുമ്പോൾ ചേർത്തോ, കുറുക്കിയോ, ഹൽവ ആയോ, ഓംലറ്റ്, ദോശ, ഇഡ്ഡലി എന്നിവയിൽ ചേർത്തോ ചമ്മന്തി അരയ്ക്കുന്നതിൽ ചേർത്തോ ഒക്കെ പരീക്ഷിക്കാവുന്നതാണ്. ഒപ്പം നല്ല കാന്താരി മുളക് ചേർത്ത് പാകം ചെയ്‌താൽ അതും ആരോഗ്യത്തിനു നല്ലത് തന്നെ.മഴക്കാലമാണ് മുളകിന്റെ ഏറ്റവും നല്ല കാലം. നല്ല കപ്പയും പാൽമുളകിട്ട മീൻകറിയുമൊക്കെ ഉണ്ടാക്കുന്ന ഒരു വൈബ് ഉണ്ടല്ലോ, അതിന്റെ ഒരിത് പറഞ്ഞറിയിക്കാൻ പറ്റില്ല ഉത്തമാ...
ഇലക്കറികൾ സ്ഥിരമായി കഴിക്കുന്നത് കൊണ്ടുള്ള ഗുണങ്ങൾ പറയാവതല്ല.
ഹരിതകം പോലെയുള്ള വർണകങ്ങൾ നല്ല ആന്റി ഓക്സിഡന്റുകളാണ്. അവയിൽ ഉള്ള പോളിഫീനോളുകളും അപ്രകാരം തന്നെ .
കലോറി കുറഞ്ഞ ഭക്ഷണമാകയാൽ പൊണ്ണത്തടി കുറയ്ക്കും.
ഫോളിക് ആസിഡ് സമ്പുഷ്ടമാകയാൽ കോശവളർച്ചയെ ഉദ്ദീപിപ്പിക്കും.വാർദ്ധക്യം താമസിപ്പിക്കും (തടയും എന്ന് പറയാൻ കഴിയില്ലല്ലോ )
ഉയർന്ന അളവിൽ നാരുകൾ ഉള്ളതിനാൽ വിസർജനം സുഗമമാക്കും.
ഉയർന്ന തോതിൽ വിറ്റാമിനും ധാതുക്കളും ഉള്ളതിനാൽ രോഗ പ്രതിരോധ ശേഷി കൂട്ടും.
നന്നായി മൂത്രത്തിന്റെ അളവ് കൂട്ടി വൃക്കകളെ ശുദ്ധീകരിക്കും.(Diuretic ).
രക്തത്തിലെ കൊഴുപ്പിനെ കുറയ്ക്കും. കൊളസ്ട്രോളിനെ നിയന്ത്രിക്കും.
രക്ത സമ്മർദം ക്രമീകരിക്കും.
ചുരുക്കത്തിൽ,ഇലക്കറികൾ ശീലമാക്കിയാൽ മലയാളി ഇന്ന് നേരിടുന്ന ഒരു പിടി ആരോഗ്യപ്രശ്നങ്ങൾ തീണ്ടാപ്പാടകലത്തിൽ നിർത്താൻ സാധിക്കും.
ഇംഗ്ലീഷ് ഇലക്കറികളെ ഇത്തരുണത്തിൽ മാറ്റി നിർത്തേണ്ട കാര്യമില്ല. ലെറ്റ്യൂസ് ,കാബേജ്, ബ്രോക്കോളി ഇലകൾ, സ്പിനാഷ്, കെയിൽ, ലീക്, സെലറി, മല്ലിയില, എന്നിവയും തരം പോലെ ആഹരിക്കാം.
ഒപ്പം വള്ളിച്ചീര, മധുരച്ചീര, പൊന്നാരി വീരൻ (ഒരു തരം തകര ) , ചായ മൻസ, സൗഹൃദചീര(Pisonia ) പൊന്നാംകണ്ണി ചീര, മധുരക്കിഴങ്ങിന്റെ ഇല, കുടങ്ങലിന്റെ ഇല, കോവയ്ക്കയുടെ ഇല, ഇളം പ്ലാവില, ഇളം വാഴയില എന്നിവയൊക്കെ മാറി മാറി വിരസതയുണ്ടാകാത്ത വിധം പയർ വർഗ്ഗങ്ങൾ ഒക്കെ ചേർത്ത് തീന്മേശകളിൽ എത്തിക്കാവുന്നതാണ്.
From Farm to Table... ഇനി ടേബിൾ ഇല്ലാത്തവർക്ക് Farm to Plate..സായിപ്പിന്റെ ഭാഷയിൽ പറഞ്ഞാൽ Farm to Fork... ഇനി വീടും കുടിയും ഇല്ലാത്തവന് 'Farm to Mouth '.. ഹല്ല പിന്നെ...
കർക്കടക മാസത്തിൽ മുരിങ്ങയിലെ അമിതമായി കഴിക്കുന്നത് തല്ക്കാലം ഒഴിവാക്കുന്നത് നന്നായിരിക്കും. ചിലപ്പോൾ, ചിലരുടെ വയറ്റിന് പിടിച്ചെന്ന് വരില്ല.(ഒരിക്കൽ എനിയ്ക്കും അനുഭവം ഉണ്ട്. ഒരു പക്ഷെ കൂടുതൽ കഴിച്ചത് കൊണ്ടും ആകാം. ) വിവാദത്തിനില്ല രമണാ..
..ന്നാ പിന്നെ പോയി കുറേ പോച്ച (പച്ചിലകൾ) പറിച്ച്, പയർ ചേർത്ത് തട്ടിയാട്ടെ.. അതിന്റെ 'കൊണകണങ്ങൾ 'പത്ത് പേരോട് പറഞ്ഞാട്ടെ... കർക്കിടകമാസം വരവായി... കരുതിയിരിക്കാം..
✍🏻 പ്രമോദ് മാധവൻ
