'ഇഞ്ചി നട്ട ലാഭവും മുടി കളഞ്ഞ സ്വൈര്യവും മലയാളത്താന്മാർക്കറിയില്ല 'എന്ന് പണ്ടാരോ പറഞ്ഞത് വെറുതെയാ.. ഇഞ്ചിക്കൃഷി ചെയ്ത് കോടിപതികൾ ആയവരെക്കുറിച്ച് നമ്മൾ നിറയെ കേട്ടിട്ടുണ്ട്🤭.കുത്ത് പാളയെടുത്തവരും കുറവല്ല.
എന്നാൽ പലപ്പോഴും ഇഞ്ചികൃഷി കഴിയുമ്പോൾ കർഷകൻ ഇഞ്ചി തിന്ന കുരങ്ങിനെ പോലെ ആകാറുണ്ട്. കാരണം അത്രയേറെ റിസ്ക് ഇഞ്ചികൃഷിയിൽ ഉണ്ട്.
വാണിജ്യ ഇഞ്ചികൃഷിയിൽ തത്വദീക്ഷ ഇല്ലാതെ രാസവസ്തുക്കൾ പ്രയോഗിക്കപ്പെടുന്നുണ്ട്. ഗതികേട് കൊണ്ട് കൂടിയാണ് കർഷകൻ അതിന് പ്രേരിതനാകുന്നത്. കാരണം അത്രയേറെ കീട രോഗങ്ങൾ,അതും മാരകമായവ ഇഞ്ചിയെ ബാധിക്കുന്നുണ്ട്.
അവ ഏതൊക്കെ ആണെന്നും അവയെ ശാസ്ത്രീയമായ രീതിയിൽ എങ്ങനെ നേരിടണം എന്നും നോക്കാം.
ഞാറ്റുവേല നിയമങ്ങൾ പ്രകാരം 'കാർത്തികയുടെ ഒന്നാം കാലിൽ (അതായത് മെയ്‌ മാസം 11-14തീയതികളിൽ )ആണ് ഇഞ്ചി നടേണ്ടത്. അതും ഒരുപാട് വിത്തൊന്നും വേണ്ട, ഒന്നോ രണ്ടോ മുളകൾ ഉള്ള കാശോളം വരുന്ന ഒരു കഷ്ണം. കീട രോഗശല്യം കുറയ്ക്കാൻ കാഞ്ഞിരത്തിന്റെ തോലിന്റെ കരിമ്പടം പുതപ്പിച്ച് നട്ടാൽ പിന്നെ പേടിക്കേണ്ട എന്നായിരുന്നു ആക്കാലം.
അന്ത കാലം എല്ലാം പോയാച്ചു..
ഇന്നിപ്പോൾ ആരൊക്കെയാണ് ഇഞ്ചിയെ പീഡിപ്പിക്കാൻ നടക്കുന്നത്?
Pythium എന്ന പൈത്യക്കാരൻ ഫംഗസ്. മൂന്ന് അവതാരങ്ങളിൽ.
P.aphanidermatum
P. vexans
P. myriotylum. വളഞ്ഞിട്ട് പിടിക്കും, ഒരുത്തനല്ലെങ്കിൽ മറ്റവൻ. പിടിച്ചു കഴിഞ്ഞാൽ ആ ഇഞ്ചിപ്പണ പോയിപ്പോച്ചു.
മൃദു ചീയൽ അഥവാ Soft rot എന്ന രോഗം.
അത് പിടിച്ചില്ലെങ്കിൽ അതാ വരുന്നു ബാക്റ്റീരിയൽ വാട്ടം. വഴുതനയെയും തക്കാളിയെയും വാട്ടുന്നവൻ തന്നെ. Ralstonia solanacearum.
പകുതി വളർച്ചയെത്തുമ്പോൾ അതാ വരുന്നു ഇല കരിച്ചിൽ. Phyllosticts zingiberi എന്ന ഫംഗസ് അടക്കമുള്ള ഒരു കൂട്ടർ. കൂടെ Helminthosporium, Colletotrichum, Pyricularia എന്നിവർ. ഇതൊക്കെ നെല്ലിലും പുല്ലിലും ഒക്കെ ആയി എപ്പോഴും തക്കം പാർത്തു കഴിയുന്നവർ.ചെടിയുടെ യൗവനം മുഴുവൻ അത് കാർന്നു തിന്നും.
അതും കടന്ന് ചെല്ലുമ്പോൾ അതാ നിൽക്കുന്നു തണ്ട് തുരപ്പൻ. Conogethus punctiferalis. നടു നാമ്പ് ഊരിയിഞ്ഞു പോരും. അകത്തുള്ള മുറിവിലൂടെ അഴുകലും തുടങ്ങും.
പിന്നെ വേര് ബന്ധക നിമാവിരകൾ. Meloidogyne, Radopholus, Pratylenchus എന്നിങ്ങനെ.
വിടില്ല ഞാൻ..
അതും കടന്നാൽ മണ്ണിൽ ഉള്ള വെള്ളപ്പുഴുക്കൾ. White Grub. Holotrichia.
ഇനി നല്ല വിത്തല്ല നടാൻ എടുത്തത് എങ്കിൽ അതിലൂടെ വന്ന ചെതുമ്പൽ കീടം. Rhizome Scale insect. Aspidiella hartii.
പോരേ പൂരം. ഇതൊക്കെ കൊണ്ടാണ് സഹോ കൃഷിക്കാരൻ മരുന്നടിക്കാൻ നിർബന്ധിതനാകുന്നത്.
ഇതിൽ പല പ്രശ്നങ്ങൾക്കും ക്ഷിപ്ര ഫലപ്രാപ്തിയുള്ള ജൈവ ബദലുകളുമില്ല.
ഇന്ത്യയിൽ ഏറ്റവും കൂടുതൽ ഇഞ്ചി ഉണ്ടാക്കുന്നത് കേരളത്തിൽ അല്ല.
മധ്യപ്രദേശ് കർണാടക, ഒറീസ്സ, മേഘാലയ, ആസാം, സിക്കിം എന്നിവരൊക്കെയാണ്.
നമ്മളും ഉണ്ടാക്കുന്നു എന്ന് പറയാം.
ലോകത്ത് ഏറ്റവും കൂടുതൽ സ്ഥലത്ത് ഇഞ്ചി കൃഷി ചെയ്യുന്നത് ഇന്ത്യയിലാണ്. പക്ഷെ ഏറ്റവും കൂടുതൽ ഉത്പാദനം ചൈനയിലാണ്. എന്നാൽ ഉത്പാദനക്ഷമത ഏറ്റവും കൂടുതൽ തായ്‌ലൻഡ് ൽ ആണ്. ഹെക്റ്ററിന് 16.85 ടൺ.
ഇന്ത്യ വെറും 3.58. ടൺ.
പക്ഷെ ലോകോത്തരങ്ങളായ കുറേ നല്ല ഇനങ്ങൾ നമുക്കുണ്ട്.
മാരൻ
മാനന്തോടി
വയനാടൻ
കുറുപ്പം പാടി
നാദിയ
കോഴിക്കോടുള്ള ദേശീയ സുഗന്ധവിള ഗവേഷണ കേന്ദ്ര സന്തതികളായ വരദ, രജത, മഹിമ അങ്ങനെ പോകുന്നു...
കഴിഞ്ഞ ആഴ്ചയിൽ, കൃഷി വകുപ്പിൽ നിന്നും ജോയിന്റ് ഡയറക്ടർ ആയി വിരമിച്ച ജോൺ അലക്സ്‌ സർ മേഘാലയയിൽ നിന്നും നാദിയ എന്ന ഇനത്തിന്റെ വിത്ത് കൊറിയർ ചെയ്ത് തന്നു. നല്ല ബോൾഡ് ആയ ഭൂകാണ്ഡങ്ങൾ. നല്ല മണവും തീക്ഷ്‌ണതയും. അവിടുത്തെ East Garo &West Garo Hills ഇന്ത്യയിൽ തന്നെ ഏറ്റവും കൂടുതൽ ഇഞ്ചി ഉൽപ്പാദിപ്പിക്കുന്ന ഇടങ്ങളാണ്.Thanks Sir🙏🙏
ഇഞ്ചി കൃഷിയിൽ തട്ട് കിട്ടാതിരിക്കാൻ എന്തൊക്കെ ചെയ്യണം?
നല്ല വിത്ത് മാത്രമേ നടാൻ എടുക്കാവൂ. യാതൊരു കാരണവശാലും Soft rot, Bacterial Wilt, Rhizome Scale എന്നിവ ബാധിച്ച വിത്ത് നടാൻ എടുക്കരുത്.
ഇനി എത്ര നല്ല വിത്തായാലും അത് ഒരു ലിറ്റർ വെള്ളത്തിൽ 3ഗ്രാം Mancozeb കലക്കിയ ലായനിയിൽ അര മണിക്കൂർ മുക്കിയിട്ട ശേഷം മാത്രമേ നടാൻ ഉപയോഗിക്കാവൂ.നമുക്ക് 'നമ്പിക്കൈ 'ഇല്ല, വിതൈയുടെ കാര്യത്തിൽ.
നല്ല ഉയരത്തിൽ പണകൾ കോരി മാത്രമേ ഇഞ്ചി നടാവൂ. അല്പമെങ്കിലും വെള്ളക്കെട്ട് വന്നാൽ പിന്നെ Pythium എപ്പം വന്നു എന്ന് നോക്കിയാൽ മതി.
ഒരേ സ്ഥലത്ത് ഒന്നിലധികം തവണ ഇഞ്ചി നടരുത്. Crop rotation നടത്തണം.
മണ്ണ് കിളച്ചു കട്ടയുടച്ചു സെന്റിന് 2-3കിലോ കുമ്മായപ്പൊടി ചേർത്ത് ഇളക്കി രണ്ടാഴ്ച ഇടുന്നത് കുമിളുകളുടെ ക്രൗര്യം കുറയ്ക്കാൻ സഹായിക്കും.
അടിസ്ഥാന വളമായി ഓരോ തടത്തിലും ട്രൈക്കോഡർമയാൽ സമ്പുഷ്‌ടീകരിച്ച ചാണകപ്പൊടി -വേപ്പിൻ പിണ്ണാക്ക് മിശ്രിതം തന്നെ ചേർത്ത് കൊടുക്കണം.
ഉണങ്ങിയ കരിയിലകൾ പല തവണ പുതയായി വച്ച് കൊടുക്കണം.
ചട്ടിയിലോ ഗ്രോ ബാഗിലോ ചെയ്യുമ്പോൾ നിറയ്ക്കുന്ന മിശ്രിതത്തിൽ സൂര്യതാപീകരണം(Solarization ) നടത്തിയിരിക്കണം.
മാസത്തിൽ ഒരിക്കൽ സുഡോമോണാസ് ലായനി ഇഞ്ചി ത്തടങ്ങളിൽ ഒഴിച്ച് കുതിർത്ത് കൊടുക്കണം.
കളകൾ വളരാൻ അനുവദിക്കരുത്. വളർന്നാൽ അവയിലൂടെ കുമിൾ രോഗങ്ങൾ വരും.
എന്തെങ്കിലും പകർച്ച വ്യാധി കണ്ടാൽ ഉടൻ തന്നെ മണ്ണോടു കൂടി പിഴുതെടുത്തു ദൂരെ കൊണ്ട് പോയി കളയണം. മണ്ണിൽ ബ്ലീച്ചിങ് പൌഡർ ലായനി ഒഴിച്ച് അണുക്കളെ കൊല്ലണം.
ഇഞ്ചിപ്പണയിൽ ഉപയോഗിക്കുന്ന കാർഷിക ഉപകരണങ്ങൾ വഴി രോഗം പകരാം. രോഗം ബാധിച്ച മണ്ണിൽ കിളച്ച കുന്താലി കൊണ്ട് കിളയ്ക്കുമ്പോൾ അടുത്ത പണയിലേയ്ക്ക് രോഗാണുക്കൾ പകരാം. എന്തിന് നടക്കുമ്പോൾ നമ്മുടെ കാലിൽ പറ്റിയ രോഗഗ്രസ്തമായ മണ്ണിൽ നിന്ന് പോലും രോഗം പെട്ടെന്ന് വ്യാപിക്കാം.
ഇനി ഇത്തരം രോഗം കാണുന്ന മാത്രയിൽ തന്നെ ഒരു കൃഷി ഡോക്ടറുമായി ചർച്ച ചെയ്ത് Ridomil Gold, Kocide, Streptocycline തുടങ്ങിയവ യഥാവിധി ഉപയോഗിച്ച് രോഗത്തെ തടുത്ത് നിർത്തണം.
അടുക്കളകളിൽ 365 ദിവസവും വേണ്ട പച്ചക്കറിയാണ് ഇഞ്ചി. രാസമരുന്നുകൾ വാരിക്കോരി പ്രയോഗിക്കണമെന്ന് ആരും ആഗ്രഹിക്കുന്നില്ല. കാരണം നല്ല ചെലവും വരുന്നുണ്ടല്ലോ. എന്നാൽ പലപ്പോഴും കർഷകന് ശാസ്ത്രീയവബോധം ഇല്ലാത്തത് കൊണ്ടും ശരിയായ സമയത്ത് നിയന്ത്രണ മാർഗങ്ങൾ അവലംബിക്കാത്തത് കൊണ്ടും കാലാവസ്ഥ വ്യതിയാനം കൊണ്ടുമൊക്കെ ആണ് അത്തരം ദുർഗതി വന്ന് കൂടുന്നത്.
കാര്യങ്ങളൊക്കെ മനസ്സിലായ സ്ഥിതിക്ക് എഴീച്ചു പോയി പത്ത് കഷ്ണം ഇഞ്ചി ശാസ്ത്രീയമായി നടാൻ നോക്കിയാട്ട്...
എന്നാൽ അങ്ങട്...
പ്രമോദ് മാധവൻ
