ഗ്രോ ബാഗ് കൃഷിയുടെ വിജയം പ്രധാനമായും അതിൽ നിറയ്ക്കുന്ന മിശ്രിതത്തെ ആശ്രയിച്ചിരിക്കുന്നു. ഒരു നല്ല പോട്ടിംഗ് മിശ്രിതം ചെടികളുടെ വേരുകൾക്ക് ആവശ്യമായ വായു സഞ്ചാരം, ഈർപ്പം നിലനിർത്താനുള്ള കഴിവ്, ആവശ്യമായ പോഷകങ്ങൾ എന്നിവ ഉറപ്പാക്കണം. ഗുണമേന്മയുള്ള പോട്ടിംഗ് മിശ്രിതം തയ്യാറാക്കാൻ ചേർക്കേണ്ടതും ഒഴിവാക്കേണ്ടതുമായ ചില പ്രധാന കാര്യങ്ങൾ ഉണ്ട്.
മിശ്രിതത്തിൽ ചേർക്കേണ്ടവ:
ചകിരിച്ചോറ്:
**************
ഇതിന് അതിന്റെ ഭാരത്തിന്റെ 8 മുതൽ 10 മടങ്ങ് വരെ ഈർപ്പം നിലനിർത്താൻ കഴിയും, ഇത് ചെടികൾക്ക് സ്ഥിരമായി ജലാംശം ഉറപ്പാക്കുകയും വെള്ളം ഒഴിക്കുന്നതിന്റെ ഇടവേള വർദ്ധിപ്പിക്കുകയും ചെയ്യുന്നു. കട്ടിയുള്ള മണ്ണിൽ വായുസഞ്ചാരം കുറവായതിനാൽ വേരുകൾക്ക് ശരിയായ വളർച്ച തടസ്സപ്പെടാറുണ്ട്; എന്നാൽ, ചകിരിച്ചോറ് മിശ്രിതത്തിന് നല്ല ഘടനയും ഇളക്കവും നൽകുന്നതിനാൽ വേരുകൾക്ക് നന്നായി വളരാനും ആവശ്യമായ വായു എളുപ്പത്തിൽ വലിച്ചെടുക്കാനും സാധിക്കുന്നു. കൂടാതെ, ഭാരം തീരെ കുറവായതിനാൽ ടെറസ്സിലെ കൃഷിക്ക് ഇത് ഏറ്റവും അനുയോജ്യമാണ്.
ജൈവ വളം:
**************
വിളകളുടെ ആരോഗ്യകരമായ വളർച്ചയ്ക്ക് അത്യന്താപേക്ഷിതമായ ജൈവ വളങ്ങളിൽ പ്രധാനപ്പെട്ടവയാണ് മണ്ണിര കമ്പോസ്റ്റ്, പഴകിയ കാലിവളം, അടുക്കള മാലിന്യത്തിൽ നിന്നുള്ള കമ്പോസ്റ്റ് എന്നിവ. ഈ മൂന്ന് വളങ്ങളും ചെടികൾക്ക് നൈട്രജൻ, ഫോസ്ഫറസ്, പൊട്ടാസ്യം (NPK) തുടങ്ങിയ സ്ഥൂല പോഷകങ്ങൾക്കൊപ്പം മറ്റ് സൂക്ഷ്മ പോഷകങ്ങളും ലഭ്യമാക്കുന്നു. ഈ ജൈവവളങ്ങൾ ശരിയായ അളവിൽ ഉപയോഗിക്കുന്നത് ചെടികളുടെ രോഗപ്രതിരോധശേഷി വർദ്ധിപ്പിക്കാനും, രാസവളങ്ങളെ ആശ്രയിക്കുന്നത് കുറയ്ക്കാനും, ഉൽപ്പാദനം വർദ്ധിപ്പിക്കാനും സഹായിക്കുന്നു.
മണ്ണ്:
******
ഗ്രോ ബാഗ് കൃഷിയിൽ ഭാരം കുറയ്ക്കുന്നതിനായി മണ്ണ് പൂർണ്ണമായും ഒഴിവാക്കാമെങ്കിലും, ചെടിയുടെ ആരോഗ്യകരമായ നിലനിൽപ്പിന് ഗുണമേന്മയുള്ള മേൽമണ്ണിന്റെ സാന്നിധ്യം വളരെ പ്രധാനമാണ്. മണ്ണ് പ്രധാനമായും ചെടികളുടെ വേരുകൾക്ക് ഉറച്ച താങ്ങും ബലവും നൽകുന്നു, ഇത് കായ്ഫലം ഉണ്ടാകുമ്പോൾ ചെടി മറിഞ്ഞുവീഴാതെ സംരക്ഷിക്കുന്നു. കൂടാതെ, മണ്ണിലാണ് ചെടികൾക്ക് ആവശ്യമായ നിരവധി സൂക്ഷ്മ മൂലകങ്ങളും ഉപകാരികളായ സൂക്ഷ്മാണുക്കളും നിലനിൽക്കുന്നത്. ടെറസ് കൃഷിയിൽ ഭാരം കുറയ്ക്കാൻ ചകിരിച്ചോറോ കരിയിലയോ പ്രധാന ഘടകമാക്കുമ്പോൾ പോലും, ആവശ്യത്തിന് ഗുണമേന്മയുള്ള മണ്ണ് ചേർക്കുന്നത് നടീൽ മിശ്രിതത്തിന്റെ പോഷക സംരക്ഷണ ശേഷിയും സ്ഥിരതയും വർദ്ധിപ്പിച്ച് മികച്ച വിളവ് ഉറപ്പാക്കാൻ സഹായിക്കും.
മണൽ, പെർലൈറ്റ്, വെർമിക്യുലൈറ്റ്:
*****************************************
ഗ്രോ ബാഗിലെ നടീൽ മിശ്രിതത്തിന്റെ ഗുണമേന്മ വർദ്ധിപ്പിക്കുന്നതിൽ മണൽ, പെർലൈറ്റ്, വെർമിക്യുലൈറ്റ് തുടങ്ങിയവയ്ക്ക് സുപ്രധാനമായ പങ്കുണ്ട്. ഇവയിൽ, പെർലൈറ്റ് മിശ്രിതത്തിൽ ചേർക്കുമ്പോൾ വായുസഞ്ചാരം ഉറപ്പാക്കുകയും, അധിക ജലം വേഗത്തിൽ വാർന്നുപോകാൻ സഹായിക്കുകയും ചെയ്യുന്നതിനാൽ വേരുകൾ അഴുകിപ്പോകുന്നത് തടയുന്നു. എന്നാൽ വെർമിക്യുലൈറ്റ്ന് ഉയർന്ന ജലാംശവും പോഷകങ്ങളും ആഗിരണം ചെയ്യാനും നിലനിർത്താനുമുള്ള കഴിവുണ്ട്, ഇത് ചെടികൾക്ക് ആവശ്യമായ ഈർപ്പം ദീർഘകാലത്തേക്ക് ലഭ്യമാക്കാൻ സഹായിക്കുന്നു. അതേസമയം, മണൽ മിശ്രിതത്തിന് നല്ല ഈർപ്പമുള്ള ഘടന നൽകുകയും വെള്ളം എളുപ്പത്തിൽ താഴേക്ക് പോകാൻ സഹായിക്കുകയും ചെയ്യുന്നു. ഈ മൂന്ന് ഘടകങ്ങളും ചേർക്കുമ്പോൾ, ചെടികളുടെ സമൃദ്ധമായ വളർച്ചയ്ക്കും ഇരട്ടി വിളവിനും സഹായിക്കുകയും ചെയ്യുന്നു.
പിണ്ണാക്കുകൾ:
****************
നൈട്രജൻ, ഫോസ്ഫറസ്, മറ്റ് പോഷകങ്ങൾ എന്നിവയുടെ കലവറയാണ് പിണ്ണാക്കുകൾ, ഇത് ചെടികളുടെ സമഗ്രമായ വളർച്ചയ്ക്കും ഉത്പാദനത്തിനും അത്യാവശ്യമാണ്. കടലപ്പിണ്ണാക്ക് നൈട്രജന്റെയും മറ്റ് സൂക്ഷ്മ പോഷകങ്ങളുടെയും മികച്ച ഉറവിടമാണ്, ഇത് ചെടികൾക്ക് കരുത്തും നല്ല ഇലകളുടെ വളർച്ചയും നൽകുന്നു. അതുപോലെ, എല്ലുപൊടി ഫോസ്ഫറസിന്റെയും കാൽസ്യത്തിന്റെയും പ്രധാന ഉറവിടമായതിനാൽ, ഇത് ചെടികളിൽ കൂടുതൽ പൂക്കളും കായ്കളും ഉണ്ടാകാനും, വേരുകൾക്ക് ബലം നൽകാനും സഹായിക്കുന്നു. വേപ്പിൻ പിണ്ണാക്ക് അതിന്റെ കീടനിയന്ത്രണ ശേഷിയിലൂടെ വേരുകളെ ആക്രമിക്കുന്ന നിമാവിരകൾ, മറ്റ് കീടങ്ങൾ, കുമിളുകൾ എന്നിവയിൽ നിന്നും ചെടികളെ സംരക്ഷിക്കുകയും, മണ്ണിന്റെ ആരോഗ്യത്തിന് പ്രകൃതിദത്തമായ പ്രതിരോധം നൽകുകയും ചെയ്യുന്നു.
പോട്ടിംഗ് മിശ്രിതത്തിൽ ചേർക്കാൻ പാടില്ലാത്ത കാര്യങ്ങൾ:
കളിമണ്ണോ പാടത്തെ കട്ടിയുള്ള മണ്ണോ ഗ്രോ ബാഗുകളിൽ ഉപയോഗിക്കുന്നത് വളരെ ദോഷകരമാണ്, കാരണം ഈ മണ്ണ് പെട്ടെന്ന് കട്ടപിടിക്കുകയും മിശ്രിതത്തിന്റെ നീർവാർച്ചാ ശേഷി കുറയ്ക്കുകയും ചെയ്യുന്നു; ഇത് കാരണം വെള്ളം വേരുകൾക്ക് ചുറ്റും കെട്ടിക്കിടക്കുകയും ചെടികളുടെ വേരുകൾ അഴുകിപ്പോകാൻ കാരണമാവുകയും ചെയ്യും.
കൂടാതെ, പഴയ പോട്ടിംഗ് മിശ്രിതം വീണ്ടും ഉപയോഗിക്കുമ്പോൾ അത് രോഗാണുക്കളുടെ ഉറവിടമാകാൻ സാധ്യതയുണ്ട്. അതിനാൽ, രോഗം ബാധിച്ച ചെടി വളർന്ന മണ്ണ് വീണ്ടും ഉപയോഗിക്കുന്നതിന് മുമ്പ്, അതിലെ രോഗകാരികളെയും കീടങ്ങളെയും നശിപ്പിക്കുന്നതിനായി, ശക്തമായ സൂര്യപ്രകാശത്തിൽ നന്നായി നിരത്തിയിട്ട്കുമ്മായവും ചേർത്ത് ഉണക്കി അണുവിമുക്തമാക്കേണ്ടത് അത്യാവശ്യമാണ്.
ജൈവകൃഷിയിൽ ചാണകവും അടുക്കള മാലിന്യവും വളരെ മികച്ച വളങ്ങളാണെങ്കിലും, ഉപയോഗിക്കുന്നതിന് മുമ്പ് അവ ശരിയായ രീതിയിൽ സംസ്കരിക്കേണ്ടത് അത്യാവശ്യമാണ്. പുതിയതോ ഉണങ്ങാത്തതോ ആയ കാലിവളം നേരിട്ട് പോട്ടിംഗ് മിശ്രിതത്തിൽ ചേർക്കുന്നത് അതിലടങ്ങിയിരിക്കുന്ന നൈട്രജൻ വിഘടിക്കുമ്പോൾ അമിതമായ ചൂട് ഉത്പാദിപ്പിക്കുകയും, ഇത് ചെടിയുടെ വേരുകളെ കരിച്ചുകളഞ്ഞ് നശിപ്പിക്കുകയും ചെയ്യും.
അതുപോലെ, ഭക്ഷണാവശിഷ്ടങ്ങൾ കമ്പോസ്റ്റാക്കാതെ നേരിട്ട് നടീൽ മിശ്രിതത്തിൽ ചേർക്കുന്നത്, അത് സാവധാനം അഴുകുമ്പോൾ അസുഖകരമായ ദുർഗന്ധം ഉണ്ടാക്കാനും, കൂടാതെ എലികൾ, ഈച്ചകൾ, മറ്റ് കീടങ്ങൾ എന്നിവയെ ആകർഷിച്ച് രോഗാണുക്കളുടെ വ്യാപനത്തിന് കാരണമാകാനും സാധ്യതയുണ്ട്. അതിനാൽ, പുതിയ കാലിവളവും ഭക്ഷണ മാലിന്യങ്ങളും ഉപയോഗിക്കുന്നതിന് മുമ്പ്, അവ നന്നായി ഉണക്കിയോ അല്ലെങ്കിൽ ഇവ കമ്പോസ്റ്റാക്കിയ ശേഷം മാത്രമേ ചേർക്കാവൂ.
വിളകളുടെ ആരോഗ്യമുള്ള വളർച്ചയ്ക്കും മികച്ച ഉൽപാദനത്തിനും ഗുണമേന്മയുള്ള പോട്ടിംഗ് മിശ്രിതം തിരഞ്ഞെടുക്കുന്നതിലും തയ്യാറാക്കുന്നതിലും അതീവ ശ്രദ്ധ ചെലുത്തേണ്ടത് അത്യാവശ്യമാണ്, കാരണം ഓരോ ചെടിയുടെയും ആവശ്യകതകൾ വ്യത്യസ്തമാണ്. പോഷകങ്ങളുടെയും ജലാംശത്തിന്റെയും കൃത്യമായ സന്തുലനം ഉറപ്പാക്കുന്ന മിശ്രിതം തയ്യാറാക്കുന്നതിലാണ് മികച്ച വിളവിന്റെ രഹസ്യം..........
