വാഴ
മണ്ഡരിയാക്രമണം കുടുന്നു. ഇവയെ നിയന്ത്രിക്കുന്നതിന് ചുവടുഭാഗത്തുള്ള മണ്ണിൽനിന്നു മുകളിലേക്കു മരുന്ന് സ്പ്രേ ചെയ്യണം. താഴേക്കു വീണ മണ്ഡരി ഒളിവിൽപോയി രക്ഷപ്പെടുന്നതു തടയാനും ഇതുപകരിക്കും. ഇലയുടെ അടിവശത്തും കുമ്പിലും കവിളുകളിലും പ്രേ വീഴുന്നുണ്ടെന്ന് ഉറപ്പാക്കുക.
ജൈവനിയന്ത്രണത്തിന് വൈകുന്നേരം വെയിൽ ആറിയതിനുശേഷം വെറ്റിങ് ഏജന്റ് ചേർത്ത വെർട്ടിസീലിയം ചെയ്യുക. രാസനിയന്ത്രണത്തിന് വിപണിയിൽ ലഭ്യമായ Accarcide കളിൽ ഏതെങ്കിലും ഒന്ന് ഉപയോഗിച്ചാൽ മതി. എല്ലാ കീടനാശിനികൾക്കും മണ്ഡരിനിയന്ത്രണശേഷിയില്ലെന്ന് പ്രത്യേകം ഓർമിക്കുക. നനയ്ക്കുന്ന വാഴകളിലാണ് മണ്ഡരിയുടെ ആക്രമണം ഏറ്റവും വ്യാപകം. സാധാരണ ഗതിയിൽ രാവിലെ 8 മണിക്കു മുൻപ് വാഴയിലയുടെ അടിയിൽ ഇവയെ കാണാം. ആക്രമണം രൂക്ഷമെങ്കിൽ ഇലയുടെ അടിഭാഗം ചെമ്പു നിറത്തിലാകും. പൊടിവാഴയ്ക്കു പുതയുടെ കനം കൂട്ടുക. കിളിർത്തതിനു ശേഷം നനയ്ക്കുന്നില്ലെങ്കിൽ പൊട്ടാസ്യം സിലിക്കേറ്റ് പ്രേ ചെയ്യുക.
ഇഞ്ചി, മഞ്ഞൾ
ഭൂമി തണുക്കുന്ന വിധത്തിൽ മഴ ലഭിച്ചാൽ ഇഞ്ചിക്കൃഷിക്ക് തയാറെടുക്കാം. ഒരു മീറ്റർ വീതിയും 25 സെ. മീ. ഉയരവും ഉള്ള വാരങ്ങളാണ് ഒരുക്കേണ്ടത്. നീളം ഭൂമിയുടെ കിടപ്പ് അനുസരിച്ചു ക്രമീകരിക്കാം. വാരങ്ങൾ തമ്മിൽ 35-40 സെ. മീ. അകലം വേണം. വാരത്തിൽ ചതുരശ്ര മീറ്ററിന് 500 ഗ്രാം മുതൽ 600 ഗ്രാം വരെ ട്രൈക്കോഡെർമ ചേർത്ത് സമ്പുഷ്‌ടീകരിച്ച ജൈവവളം നന്നായി ഇളക്കിച്ചേർക്കുക.
കാച്ചിൽ, അടതാപ്പ്
നടുന്നതിന് എടുക്കുന്ന കുഴിയിൽ 1.5 കിലോ ജൈവവളമിട്ട്, 45 സെ.മീ. ആഴത്തിൽ ഇളക്കിച്ചേർത്ത് 250 ഗ്രാം തൂക്കമുള്ള കഷണങ്ങൾ നടുക. നട്ടതിനുശേഷം മുകളിലേക്ക് മൺകൂന (ഉടൽ) എടുത്തുവയ്ക്കുക. കുഴികൾ തമ്മിൽ 45 സെ.മീ. അകലം വേണം.
ചെറുകിഴങ്ങുകൾ
നടുന്നതിന് എടുത്ത കുഴികളിൽ ഒരു കിലോ വീതം ജൈവവളമിട്ടശേഷം 25 സെ. മീ. എങ്കിലും ആഴത്തിൽ കിളച്ചു ചേർത്ത് അതിൽ 100-150 ഗ്രാം തൂക്കമുള്ള കിഴങ്ങുകൾ നട്ട് കുനകൾ എടുത്ത് മൂടുക. കൂനകൾ തമ്മിൽ 75 സെ.മീ. അകലം ഉണ്ടായിരിക്കണം.
വേനൽക്കാല പച്ചക്കറി
ഉയർന്ന താപനില വെള്ളീച്ചകളുടെ ആക്രമണതീവ്രത കൂട്ടുന്നതായി കാണുന്നു. വെള്ളീച്ചകളെ ആകർഷിച്ച് കെണിയിൽപെടുത്തുന്നതിന് ഏറ്റവും ഫലപ്രദമായ നിയന്ത്രണമാർഗം മഞ്ഞക്കെണികളാണ്. ഇവ കൃഷിയിടത്തിന്റെ അതിരുകളിൽ എല്ലാ വശത്തും സ്‌ഥാപിക്കണം. പുറത്തുനിന്നുള്ള പ്രാണികളുടെ വരവു നിയന്ത്രിക്കാനും അകത്തുള്ളവയെ കെണിയിൽപെടുത്താനും ഇതു സഹായകരമാണ്.
പച്ചക്കറിയുടെ തടങ്ങളിൽ തണ്ടിൽ നിന്ന് 5 സെ. മീ. എങ്കിലും അകറ്റി പുതയിടുക. നനയ്ക്കുന്ന വെള്ളം മേൽമണ്ണിനടിയിൽ വേരുപടലത്തിനടുത്തെത്തുന്നുണ്ടെന്ന് ഉറപ്പാക്കുക. വിഷുവിനു വിളവെടുത്തതിനു ശേഷവും പച്ചക്കറികൾക്കു നനയ്ക്കൊപ്പം 18- 18-18, sop എന്നിവ 3 ഗ്രാം വീതം 15 ദിവസത്തെ ഇടവേളയിൽ സ്പ്രേ ചെയ്യുന്നത് തുടർന്നും വിളവെടുപ്പിനു സഹായകരമാകും.
മഴക്കാല പച്ചക്കറി
മഴക്കാല പച്ചക്കറികൾക്കുള്ള തൈകൾ മേയ് മാസം ആദ്യം തന്നെ തയാറാക്കുന്നതിനുള്ള പ്രവൃത്തി ആരംഭിക്കാം. ഇതിനായി വിത്ത്, ജൈവവളം, സ്യൂഡോമോണാസ്, പ്രോട്രേകൾ എന്നിവ ഈ മാസം തന്നെ ശേഖരിക്കുക. ഏപ്രിൽ മാസം അവസാനത്തോടുകൂടി തന്നെ പച്ചക്കറി കൃഷി ചെയ്യുവാനുദ്ദേശിക്കുന്ന സ്‌ഥലത്തെ കളകൾ നീക്കണം.
ജാതി
ഈ വർഷത്തെ കാലാവസ്‌ഥയുടെ പ്രത്യേകത കൊണ്ടായിരിക്കാം ജാതിയിൽ തലമുടി രോഗം (thread blight) വ്യാപകമായി കണ്ടുവരുന്നു. ആഞ്ഞിലി മരങ്ങളിലാണ് ഈ രോഗബാധ കൂടുതൽ. നിയന്ത്രിച്ചില്ലെങ്കിൽ 3-4 വർഷം കൊണ്ടുതന്നെ വലിയ ഒരു ജാതിമരത്തെ പൂർണമായി നശിപ്പിക്കാൻ ഈ രോഗത്തിനു സാധിക്കും. നിയന്ത്രണത്തിന് ജാതിമരത്തിലുള്ള തലമുടിപോലുള്ള വളർച്ചയും അതിൽ തുങ്ങിക്കിടക്കുന്ന ഇലകളും പരമാവധി പറിച്ചെടുക്കുക. രോഗബാധയുള്ള മരത്തിൽനിന്നു പൊഴിഞ്ഞു കിടക്കുന്ന ഇലകളും അടിച്ചുകൂട്ടി തീയിട്ടു നശിപ്പിക്കുക. ഇത് പുതിയതായി രോഗം വരാതിരിക്കുന്നതിനു സഹായിക്കും. ചെമ്പ് അധിഷ്‌ഠിത കുമിൾനാശിനികൾ ശുപാർശ ചെയ്യുന്നുണ്ടെങ്കിലും നെല്ലിൽ ഉപയോഗിക്കുന്ന നേറ്റിവേ, വെൻഡിക്യൂറോൺ എന്നിവ പുതുതലമുറ wetting agent ചേർത്ത് പ്രയോഗിക്കുന്നതുവഴി നിയന്ത്രണം സാധ്യമാക്കാമെന്നാണ് കർഷകരുടെ അനുഭവം.
സമീപകാലത്തായി കർഷകർ ഏറെ താൽപര്യം കാണിക്കുന്ന വിളയാണു കമുക്. വിലക്കൂടുതലിനൊപ്പം കർഷകരുടെ ശ്രദ്ധ തിരിയുന്നതിനുള്ള മറ്റൊരു കാരണം ആക്രമണോത്സുക (invasive) കീടങ്ങൾ വ്യാപകമല്ലെന്നതാണ്. അതുകൊണ്ടുതന്നെ വിളനാശം കുറവാണ്. പല രോഗങ്ങളും പൂങ്കുലച്ചാഴിശല്യം പോലെ ചില പ്രശ്‌നങ്ങളും ചില പ്രദേശങ്ങളിൽ ഉണ്ടെങ്കിലും അത്ര രൂക്ഷമല്ല. എന്നാൽ കഴിഞ്ഞ മാസം കോട്ടയം പാലായിൽ 200 കമുകുള്ള തോട്ടത്തിലെ എൺപതിലേറെ കമുകുകളിൽ (3 മീറ്ററിൽ താഴെ ഉയരമുള്ളവ) ചെന്നീരൊലിപ്പുപോലെ കാണാനിടയായി. വേനൽക്കാല സംരക്ഷണത്തിനായി വെള്ളനിറം തേച്ച ഇവയിലെ ചെറിയ ദ്വാരങ്ങളിൽനിന്ന് ചെന്നീര് പുറത്തേക്കു വരുന്നുണ്ടായിരുന്നു. നിലവിൽ ഈ പ്രദേശത്തെ കമുകിൽ കീടശല്യം ഒന്നുമില്ലതാനും. കമുക് നിൽക്കുന്നതിനു തൊട്ടടുത്തായി തെങ്ങുകൃഷിയുണ്ട്. ഒരു കമുകിന്റെ മുകൾഭാഗം മുറിച്ചെടുത്തു പിളർന്നു നോക്കിയപ്പോൾ കണ്ടത് തെങ്ങിനെ ആക്രമിക്കുന്ന ചെമ്പൻചെല്ലിയെയും പുഴുക്കളെയുമാണ്.
തെങ്ങിൽ ചെമ്പൻചെല്ലിയാക്രമണം രൂക്ഷമായ പ്രദേശമായതിനാൽ കർഷകർ രണ്ടു മാസം കൂടുമ്പോഴെങ്കിലും അതിനെതിരെ നടപടി സ്വീകരിക്കുന്ന പ്രദേശമാണിത്. അതിനാൽ തെങ്ങിനെ വിട്ട് തൊട്ടടുത്തുള്ള കമുകിനെ ലക്ഷ്യം വച്ചതാവണം ചെമ്പൻചെല്ലി. തെങ്ങ് കിട്ടിയില്ലെങ്കിൽ കമുക് ആയാലും മതി എന്ന രീ തിയിലേക്കുള്ള ചെമ്പൻചെല്ലിയുടെ ചുവടുമാറ്റം ഗുരുതരമായ കീടബാധയുടെ തുടക്കമായി കാണേണ്ടി വരുന്നു. 8 വർഷം പഴക്കമുള്ള ഫോക്സ് ടെയിൽ പാം ചെമ്പൻചെല്ലി ആക്രമിച്ച് നശിപ്പിച്ചതായി മറ്റൊരു കർഷകന്റെ അനുഭവവും കേൾക്കാനിടയായി. കീടനിയന്ത്രണമാർഗം സ്വീകരിച്ചപ്പോൾ ചെന്നീരൊലിപ്പ് പൂർണമായും നിന്നു. ദ്രാവകം കട്ടിയായി കമുകിന്റെ തടിയിൽ ഉറയ്ക്കുകയും ചെയ്തു.
