കള പറിച്ചാൽ കളം നിറയും | പ്രമോദ് മാധവൻ

 

ഭൂമധ്യരേഖാ പ്രദേശങ്ങളിൽ, ഉഷ്ണമേഖലാ 

കാലാവസ്ഥയിൽ (Tropical Climate )കർഷകർ നേരിടുന്ന ഏറ്റവും ഗുരുതരമായ വെല്ലുവിളിയാണ് കളകളുടെ ശല്യം.കൃഷിചെലവ് കൂട്ടുന്ന പ്രവൃത്തിയാണ് കള നിയന്ത്രണം.

 കളകൾ(weeds ) കൃഷിയിലും പരിസ്ഥിതിയിലും ചെയ്യുന്ന ഗുണ-ദോഷങ്ങൾ എന്തൊക്കെയാണ് എന്നൊന്ന് നോക്കാം.

ഒരു പക്ഷെ കീട-രോഗങ്ങളെക്കാൾ, കൃഷിയിൽ കർഷകനെ ശല്യം ചെയ്യുന്നത് 'കളകൾ' ആണ്. 20-25 ശതമാനം വിളനഷ്ടത്തിന്റെ കാരണം, കളകൾ വളങ്ങൾ വലിച്ചെടുത്ത് ചെടികളുടെ വളർച്ചയെ മുരടിപ്പിക്കുന്നതാണ്.നെൽകൃഷിയിൽ ആദ്യത്തെ 42 ദിവസം കള നിയന്ത്രിച്ച് നിർത്താൻ കഴിഞ്ഞാൽ രക്ഷപ്പെട്ടു. പിന്നെ കളകൾ കാര്യമായി വളരാൻ നെല്ല് സമ്മതിക്കില്ല. നിയന്ത്രിക്കാൻ കഴിഞ്ഞില്ലെങ്കിലോ "പതിര് പതിര് പതിര് കൊണ്ടുവായോ "എന്ന് പാടേണ്ടിവരും🤭.

എവിടെ വെയിലും വെള്ളവും വളവും ഉണ്ടോ, അവിടെ ചെടികൾ താനേ വളർന്ന് വരും. അതാണ് പ്രകൃതി നിയമം.ലൈഫ് ബോയ് എവിടെയോ അവിടെയാണാരോഗ്യം എന്ന് പരസ്യത്തിൽ പറയുന്ന പോലെ. കാരണം മണ്ണിന് ഒരു കവചമായി ചെടികൾ വളർന്നില്ലയെങ്കിൽ, മണ്ണിൽ വെയിൽ നേരിട്ട് പതിക്കുകയും മണ്ണിലെ ജലാംശം നഷ്ടപെടുകയും മണ്ണിൽ ഉള്ള സൂക്ഷ്മജീവികൾ മരിക്കുകയും ചെയ്യും. അമ്മയായ പ്രകൃതി അതാഗ്രഹിക്കുന്നില്ല രമണാ...

 ഒന്നുകിൽ കള അല്ലെങ്കിൽ വിള. കയ്യൂക്കുള്ളവൻ കാര്യക്കാരൻ. അത്ര തന്നെ..രണ്ട് പേരും പ്രകൃതിയ്ക്ക് തുല്യർ.

കളകൾ Weeds) എന്നാൽ എന്താണ്?

Weeds are unwanted, persistent, harmful plants that impede the growth of other crop plants and negatively impact human activities, agricultural production and the national economy.

  അസ്ഥാനത്ത് വളരുന്ന ഏത് ചെടിയും കളയായി കണക്കാക്കാം. പറിച്ച് മറ്റേണ്ടവ.

ഉദാഹരണത്തിന് വീട്ടിലെ ചെടിച്ചട്ടിയിൽ വളർത്തുന്ന കയ്യുന്നി ഒരു ഔഷധചെടി ആണ്.

പക്ഷെ നേൽപ്പാടത്ത് അത്‌ കണ്ടാൽ വെറും ഒരു കളസസ്യം മാത്രം.

പാമ്പിനെ സർപ്പക്കാവിൽ കണ്ടാൽ ആൾക്കാർ വണങ്ങും. പക്ഷെ അതേ പാമ്പിനെ വഴിയിൽ കണ്ടാൽ ചിലപ്പോൾ അതേ ആൾക്കാർ തല്ലി എന്നിരിക്കും. അതാണ് വ്യത്യാസം.ഇരിക്കേണ്ടിടത്ത് ഇരുന്നാൽ......വർ.. യ്ക്കും.. ത്രന്നെ..

വിളകളുമായി താരതമ്യം ചെയ്യുമ്പോൾ കളകൾക്ക് ഒരുപാട് അതിജീവന ശേഷി(survival ability /adaptations ) ഉണ്ട്.

വിത്തിന്റെ മുളശേഷി നഷ്ടമാകാതെ ദീർഘനാൾ മണ്ണിനടിയിൽ കിടക്കാൻ അവയുടെ വിത്തുകൾക്ക് കഴിയും.

അവയ്ക്ക് വെള്ളക്കെട്ടിനേയും വരൾച്ചയെയും ചെറുക്കാൻ മിടുക്ക് കൂടും.

 കളകൾക്ക് കീടബാധയും രോഗബാധയും വളരെ കുറവാണ്.മാത്രമല്ല അപകടകാരികളായ കീടങ്ങളുടെയും രോഗകാരികളുടെയും വാഹകരായും (Carrier) അവർ വർത്തിക്കും.(Alternate and Collateral host plants ).

കളകളുടെ വേര് പടലം സുശക്തമായതിനാൽ കൂടുതൽ വെള്ളവും വളവും വലിച്ചെടുത്ത് വിളയെക്കാൾ മുൻപേ അവർ മണ്ണിൽ നിലയുറപ്പിക്കും.

 ആയിരക്കണക്കിന് വിത്തുകൾ ഉൽപ്പാദിപ്പിക്കാൻ അവയ്ക്ക് കഴിയും. അത് കാറ്റ് വഴിയും വെള്ളം വഴിയും ചാണകം പോലുള്ള ജൈവ വളങ്ങൾ വഴിയും കൃഷിയിടങ്ങളിൽ എത്തും.

വേരിന്റെയോ തണ്ടിന്റെയോ ഒരല്പഭാഗം മണ്ണിൽ കിടന്നാൽ തന്നെ അതിൽ നിന്നും വളർന്ന് കയറാൻ ഉള്ള കഴിവ് അവർക്കുണ്ട്.

അങ്ങനെ പോകുന്നു അവരുടെ സിദ്ധികൾ...

 'ദുഷ്ടനെ ദൈബം പനപോലെ വളർത്തുമല്ലോ!!

ഇനി മറ്റൊരു തരത്തിൽ പറഞ്ഞാൽ കളകൾ നല്ലതാണ്.😳വ്വോ.... ലതേ..

 കൃഷി ഇല്ലാത്ത സമയത്ത് മണ്ണിലെ ജലാംശം നഷ്ടപ്പെടാതെ മണ്ണിലെ സൂക്ഷ്മജീവികളെ (Plant Growth Promoting Rhizobacteria & Fungi ) സംരക്ഷിക്കുന്നത് കളകളാണ്.

മാത്രമല്ല,മണ്ണിലെ പല പാളികളിലും അലേയമായി (Insoluble/ Fixed )ആയി കിടക്കുന്ന വിലപിടിപ്പുള്ള മൂലകങ്ങളെ , കളകളുടെ വേരുകൾ പോയി തപ്പിയെടുത്ത് (Nutrient mining ) ,അവരുടെ ശരീരത്തിന്റെ ഭാഗമാക്കി, അത് ജീർണിക്കുമ്പോൾ മണ്ണിലേക്ക് മൂലകങ്ങളെ തിരികെ കൊണ്ട് വരുന്ന 'ഘർ വാപ്പസി' ധർമ്മം അവർ നിർവ്വഹിക്കുന്നുണ്ട്.

 ജൈവപിണ്ഡ (Bio mass)ഉല്പാദനത്തിനും മറ്റും കളകൾ നൽകുന്ന സംഭാവനകൾ ചെറുതല്ല.അത്‌ മണ്ണിലെ ജൈവ കാർബണിന്റെ (Soil Organic Carbon) ന്റെ അളവ് കൂട്ടുന്നു.

മറ്റൊരു തരത്തിൽ പറഞ്ഞാൽ കളകൾ ഒരു Necessary evil ആണെന്ന് പറയാം.

"കള പറിച്ചാൽ കളം നിറയും "

"ഉഴവിൽ തന്നെ കള തീർക്കണം"

എന്നൊക്കെ കേട്ടിട്ടില്ലേ?

 എങ്കിൽ, എങ്ങനെയെല്ലാം കളകളെ നിയന്ത്രിക്കാമെന്ന് നോക്കാം.

1. നിലം /പുരയിടം നന്നായി കിളച്ച് മറിച്ച് കളകൾ ഇടഞ്ഞു മാറ്റി കത്തിച്ച് ചാരമാക്കാം ,അല്ലെങ്കിൽ കമ്പോസ്റ്റ് ആക്കി മാറ്റാം.

2. ഇടയിളക്കൽ/ചിക്കൽ (Intercultural operations ) കൃത്യമായി ചെയ്യുന്നത് കളകളെ നിയന്ത്രിക്കും.

3. ഇടവിളകൾ ചെയ്യുന്നത് കളകൾ കുറയ്ക്കും.

4. കളകൾ പൂത്ത് വിത്തുകൾ പാകമാകുന്നതിനു മുൻപ് തന്നെ പറിച്ചു മാറ്റുന്നത് ബുദ്ധിപരം.

 "പാഥസാം നിജ വാർന്നൊഴിഞ്ഞളവ് സേതുബന്ധനോദ്യോഗമെന്തെടോ"? എന്നാണല്ലോ.

വിത്തുകൾ മൂപ്പായിക്കഴിഞ്ഞതിന് ശേഷം അവ പറിച്ച് കളഞ്ഞിട്ട് ഒരു കാര്യവുമില്ല. അപ്പോഴേക്കും അടുത്ത തലമുറയെ ജനിപ്പിക്കാനുള്ള വിത്തുകൾ മണ്ണിൽ വീണിരിക്കും.

5. മണ്ണിൽ ജൈവവളങ്ങൾ ചേർത്ത് നന്നായി കൂട്ടികലർത്തി പ്രകാശം കടക്കുന്ന പോളിത്തീൻ കവർ കൊണ്ട് രണ്ടാഴ്ച മൂടിയിടുന്ന രീതി ചെറുകിടക്കാർക്ക് പരീക്ഷിക്കാം. സൂര്യതാപീകരണം (Solarization )എന്ന് പറയും.

6. മിതമായ നന, അതും കഴിയുമെങ്കിൽ തുള്ളിനന രീതി അനുവർത്തിക്കണം. (സ്പ്രിംക്ലെർ നന കള വളർച്ച കൂട്ടുകയേ ഉള്ളൂ.)

7. പുതയിടുന്നത് കളവളർച്ച തടയും. പ്രത്യേകിച്ചും പ്ലാസ്റ്റിക് പുതയിടീൽ. അത് മണ്ണിലെ ജലാംശം നഷ്ടമാകുന്നതും മണ്ണ് തറഞ്ഞു പോകുന്നതും (Soil Compaction ) തടയും. പ്ലാസ്റ്റിക്കിനോട് അതൃപ്തി ഉണ്ടെങ്കിൽ വൈക്കോൽ, കരിയിലകൾ, പാഴ്പേപ്പർ എന്നിവ ഉപയോഗിച്ചും പുതയിടാവുന്നതാണ്.

8. കളവെട്ടുയന്ത്രം (Brush cutter ) ഉപയോഗിച്ച് ഇടയ്ക്കിടെ കളകൾ വെട്ടി മണ്ണിലേക്ക് ചേർത്ത് കൊടുക്കുന്നത് നല്ലതാണ്.(പക്ഷെ ഇരട്ടി വീര്യത്തോടെ അവ തിരിച്ച് വരും ).

9. അത്യാവശ്യ ഘട്ടങ്ങളിൽ സുരക്ഷിതമായ കളനാശിനികൾ നിയന്ത്രിത അളവിൽ ശരിയായ സ്പ്രേയറും നോസിലും ഉപയോഗിച്ച് തളിച്ച് കൊടുക്കാം.(കൂലിചെലവ് കുറയ്ക്കണം എന്നുണ്ടെങ്കിൽ മാത്രം ).

എന്നിരുന്നാലും കുറച്ച് കഴിയുമ്പോൾ കളകൾ വളർന്ന് വരും. "വിഷുക്കാലമല്ലേ, കണിക്കൊന്നയല്ലേ, പൂക്കാതിരിക്കാൻ എനിയ്ക്കാവതില്ലേ" എന്ന് പറയും പോലെ.

ഡീറ്റെർജന്റ് കമ്പനികളുടെ ഒരു പരസ്യ വാചകമാണ് 'കറ നല്ലതാണ് 'എന്നത്. കുട്ടികൾ സ്കൂൾ യൂണിഫോമിൽ കറകൾ ആക്കിക്കൊണ്ട് വരുമ്പോൾ ചിരിക്കുന്ന സുന്ദരിയായ അമ്മ. യൂണിഫോമിൽ കൂടുതൽ കറ പുരളുമ്പോൾ കൂടുതൽ ഡീറ്റെർജന്റ് വിറ്റുപോകും. ത്ര തന്നെ.കമ്പനി ഖുശി..

എന്നാൽ 'കള നല്ലതാണ്' എന്ന് പറയാൻ കാരണമെന്ത്?

1. കളകൾ മണ്ണൊലിപ്പ് തടയുന്നു.

2. മണ്ണിലെ ജലാംശം ആവിയായി പോകാതെ സംരക്ഷിക്കുന്നു.

3. അവയുടെ വേര് പടലത്തിൽ സൂഷ്മജീവികളെ (Rhizosphere Micro organisms )സംരക്ഷിക്കുന്നു.

4. മൂലക ചംക്രമണം നടക്കാൻ (Nutrient recycling ), മൂലക ഖനനം (Nutrient Mining ) സഹായിക്കുന്നു.

5. പല കളകളും നല്ല ഔഷധങ്ങളോ ആഹാരമായി ഉപയോഗിക്കാവുന്നതോ ആണ്. കല്ലുരുക്കി, കീഴാർനെല്ലി, കയ്യുന്നി, തഴുതാമ, കുടങ്ങൽ മുതലായവ.

6. ചില കളകൾ നല്ല അലങ്കാര ചെടികളായി ഉപയോഗിക്കാം.ഉദാഹരണം. Lantana, Antigonon, Alternanthera.

7. തേനീച്ചകൾക്ക് നല്ല പൂന്തേൻ നൽകുന്നു പല കളകളും. ഉദാഹരണം ആന്റിഗോണൊൻ, ക്വിസ്കാലിസ് (കിഴുക്കുത്തി മുല്ല ) മുതലായവ.

8. പല മിത്രകീടങ്ങളും (ചിലന്തികൾ, കടന്നലുകൾ, ലേഡി ബേഡ് വണ്ടുകൾ മുതലായവ )അധിവസിക്കുന്നത് കളകളിൽ ആണ്. അത് സ്വാഭാവിക കീടനിയന്ത്രണത്തെ സഹായിക്കുന്നു.

വാൽ കഷ്ണം :

കഴകം മൂത്ത് ശാന്തിക്കാരായ കുറച്ച് കളസസ്യങ്ങൾ ഉണ്ട്. ഗവേഷണ ആവശ്യങ്ങൾക്കോ അലങ്കാരത്തിനോ ഒക്കെ കൊണ്ട് വന്ന ചില ചെടികൾ പിന്നീട് അധിനിവേശ സ്വഭാവം(Invasive nature ) കാണിച്ചു തുടങ്ങുകയും അവ പിന്നീട് സ്വാഭാവിക ആവാസവ്യവസ്ഥകളെ വെല്ലുവിളിക്കുകയും ചെയ്യുന്നുണ്ട്.അവയെ 'ആക്രാമക/അധിനിവേശ സസ്യങ്ങൾ' (Invasive Species ) എന്ന് വിളിക്കാം.

ആഫ്രിക്കൻ പായൽ, കുളവാഴ, നാഗപ്പോള, പാർത്തീനിയം, ലന്റാന, വെഡീലിയ (കമ്മൽ ചെടി ), Mikana micrantha (ധൃതരാഷ്ട്ര പച്ച ), Senna spectabilis(കാട്ടുകൊന്ന ) തുടങ്ങിയ ഒരുപിടി ഉദാഹരണങ്ങൾ.

ഏത് വിധേനെയും തഴച്ചു വളരാൻ പ്രകൃതി കയറൂരി വീട്ടിരിക്കുന്ന അധിനിവേശ സസ്യങ്ങൾ.

തണ്ടിന്റെ ഒരു കഷ്ണം മണ്ണിൽ കിടന്നാൽ മതി, അതിൽ പിടിച്ചു ഇവറ്റകൾ വളർന്ന് പെരുകും. ധൃതരാഷ്ട്ര പച്ചയൊക്കെ ഒരു ദിവസം കൊണ്ട് മാത്രം 10 സെന്റി മീറ്റർ വരെ നീളം വയ്ക്കും. ഈ ഒരു ചെടിയുടെ വളർച്ച കാരണം നേപ്പാളിലെ ചിറ്റയ്ൻ നാഷണൽ പാർക്കിന്റെ ഏതാണ്ട് അഞ്ചിലൊന്ന് സ്ഥലത്തെ ജൈവവൈവിധ്യം നഷ്ടപ്പെട്ടു കഴിഞ്ഞു.

...അപ്പോൾ ഇങ്ങനെയൊക്കെയാണുത്തമാ... കാര്യങ്ങളുടെ കിടപ്പ്.

ഒട്ടകത്തിന് കൂടാരത്തിൽ കാല് വയ്ക്കാൻ ഒട്ടും സ്ഥലം കൊടുക്കരുത്.

ലായതിനാൽ ,ഉഴവിൽ തന്നെ കള തീർക്കണം.

..ന്നാൽ അങ്ങട്...

പ്രമോദ് മാധവൻ