കോളിഫ്ലവർ ഇലകളുടെ അടിവശത്ത് പർപ്പിൾ പൊട്ടുകളോ?
കുമിൾബാധ തിരിച്ചറിയാനും നിയന്ത്രിക്കാനും എളുപ്പവഴികൾ!

നിയന്ത്രിക്കാൻ വൈകിയാൽ ഇലകൾ കരിഞ്ഞുണങ്ങിപ്പോകുന്ന ഈ രോഗത്തെ എങ്ങനെ നേരിടാം? 🥦

🌱 കാർഷിക പാഠങ്ങൾ | Cauliflower Fungus Control

പച്ചക്കറി കൃഷിയിൽ കോളിഫ്ലവർ കൃഷി ചെയ്യുന്നവർ പലപ്പോഴും നേരിടുന്ന ഒരു പ്രധാന പ്രശ്നമാണ് ഇലകളിലെ പൂപ്പൽബാധ അഥവാ കുമിൾരോഗം. ഇലകളുടെ അടിവശത്തു പർപ്പിൾ നിറത്തിൽ ചെറിയ പൊട്ടുകളായാണ് ഈ രോഗം തുടങ്ങുന്നത്. മേൽപ്പരപ്പിൽ മഞ്ഞപ്പൊട്ടുകളും കാണാം. അടിവശത്താണ് കുമിളിൻ്റെ തന്തുക്കൾ വളരുന്നതും പൂപ്പൽ വ്യാപിക്കുന്നതും. നിയന്ത്രണം വൈകിയാൽ ഇത്തരം പാടുകൾ കൂടിച്ചേർന്നു ഇലകൾ കരിഞ്ഞുണങ്ങുകയും കോളിഫ്ലവറിൻ്റെ തലപ്പിന് നിറംമാറ്റം സംഭവിക്കുകയും ചെയ്യും.

പ്രതിരോധവും നിയന്ത്രണ മാർഗ്ഗങ്ങളും 🛡️

വെള്ളവും കാറ്റും വഴിയാണ് കുമിൾവ്യാപനം നടക്കുന്നത്, അതിനാൽ രോഗം വന്ന ചെടികൾ അപ്പപ്പോൾ തന്നെ നീക്കം ചെയ്യുക. വിളവെടുത്തു കഴിഞ്ഞ ചെടികൾ അവിടെത്തന്നെ ഉപേക്ഷിക്കാതെ നശിപ്പിച്ചുകളയണം.
നടുമ്പോൾ ചെടികൾ തമ്മിൽ ആവശ്യത്തിന് അകലം കൊടുക്കുക. ഒരേ സ്ഥലത്തുതന്നെ തുടർച്ചയായി നടാതിരിക്കാൻ പ്രത്യേകം ശ്രദ്ധിക്കുക.
ചെടികളുടെ തലപ്പിലൂടെ വെള്ളം ഒഴിച്ച് നനയ്ക്കാതിരിക്കാൻ ശ്രമിക്കുക. പ്രതിരോധം എന്ന നിലയിൽ 10 ദിവസത്തിലൊരിക്കൽ 20 ഗ്രാം സ്യൂഡോമോണസ് ഒരു ലിറ്റർ വെള്ളത്തിൽ എന്ന തോതിൽ നേർപ്പിച്ചു തടത്തിലും മറ്റും ഒഴിച്ച് കൊടുക്കുന്നത് വളരെ നല്ലതാണ്.
കുമിൾബാധ രൂക്ഷമെങ്കിൽ നിയന്ത്രിക്കാൻ കോപ്പർ ഓക്‌സിക്ലോറൈഡ് മൂന്നു ഗ്രാം ഒരു ലിറ്റർ വെള്ളത്തിൽ എന്ന തോതിൽ കലക്കി തളിക്കാവുന്നതാണ്.
ആവശ്യമെങ്കിൽ അന്തർ വ്യാപനശേഷിയുള്ള കുമിൾ നാശിനിയായ പൊട്ടാസ്യം ഫോസ്ഫോണേറ്റ് മൂന്നു മില്ലി ഒരു ലിറ്റർ വെള്ളത്തിൽ; അല്ലെങ്കിൽ മെറ്റലാക്‌സിൽ +മാങ്കോസെബ്ബ് - 1.5 മുതൽ 2 ഗ്രാം വരെ ഒരു ലിറ്റർ വെള്ളത്തിൽ എന്ന തോതിൽ തളിച്ചുകൊടുക്കാവുന്നതാണ്. കുമിൾനാശിനി തളിച്ചാൽ കുറഞ്ഞത് രണ്ടാഴ്‌ച കഴിഞ്ഞു മാത്രമേ വിളവെടുക്കാൻ പാടുള്ളൂ എന്ന് പ്രത്യേകം ഓർക്കുക.