ഒരു താക്കോൽപ്പഴുതിലൂടെ ഒരേസമയം 3 രാജ്യങ്ങൾ കാണാം!
റോമിലെ വിസ്മയക്കാഴ്ചയെക്കുറിച്ച് അറിയാം

'എമിലി ഇൻ പാരിസി'ലൂടെ ലോകശ്രദ്ധ നേടിയ 'നൈറ്റ്സ് ഓഫ് മാൾട്ടാ കീഹോൾ' 🗝️

🌍 യാത്രകൾ & കൗതുകങ്ങൾ | Knights of Malta Keyhole

നെറ്റ്ഫ്ലിക്സ‌ിലെ സൂപ്പർഹിറ്റ് സീരീസായ 'എമിലി ഇൻ പാരിസ്' കണ്ടവരാരും അതിലെ റോം യാത്രകൾ മറക്കാൻ ഇടയില്ല. കാമുകനായ മാർസെല്ലോ എമിലിയെ കൊണ്ടുപോകുന്ന വളരെ പ്രത്യേകതകളുള്ള ഒരു സ്‌ഥലമുണ്ട് ഈ സീരീസിൽ; റോമിലെ അവന്റൈൻ കുന്നുകളിലെ ഒരു പഴയ പച്ച വാതിൽ! ഒറ്റനോട്ടത്തിൽ സാധാരണയെന്ന് തോന്നുമെങ്കിലും ഈ വാതിലിന്റെ താക്കോൽപ്പഴുതിലൂടെ നോക്കിയാൽ അതിശയകരമായ ഒരു കാഴ്‌ച കാണാം. അതിർത്തികൾ കടക്കാതെ ഒരേസമയം മൂന്ന് രാജ്യങ്ങൾ കാണാൻ കഴിയുന്ന ലോകത്തിലെ ഒരേയൊരു ഇടമാണിത്.

എന്തെല്ലാമാണ് അവിടെ കാണാൻ സാധിക്കുക? 👁️

'നൈറ്റ്സ് ഓഫ് മാൾട്ടാ കീഹോൾ' എന്നാണ് ചരിത്രപ്രസിദ്ധമായ ഈ സ്‌ഥലം അറിയപ്പെടുന്നത്.
ഈ ചെറിയ ദ്വാരത്തിലൂടെ ഒന്നു കണ്ണോടിച്ചാൽ ആദ്യം കാണുന്നത് ഓർഡർ ഓഫ് മാൾട്ടയുടെ ഉടമസ്‌ഥതയിലുള്ള മാൾട്ടീസ് മണ്ണാണ്.
അതിനുമപ്പുറം ഇറ്റലിയുടെ ഭാഗമായ റോം നഗരം കാണാം.
ആ കാഴ്‌ചയുടെ ഏറ്റവും ഒടുവിലായി ദൂരെ വത്തിക്കാൻ സിറ്റിയിലെ സെന്റ് പീറ്റേഴ്സ‌് ബസിലിക്കയുടെ മനോഹരമായ താഴികക്കുടം തലയുയർത്തി നിൽക്കുന്നത് കാണാൻ സാധിക്കും.

ചരിത്രവും വാസ്തുവിദ്യയും 🏛️

ഈ അദ്ഭുത കാഴ്ചയ്ക്ക് പിന്നിൽ നൂറ്റാണ്ടുകളുടെ വലിയൊരു ചരിത്രമുണ്ട്. പത്താം നൂറ്റാണ്ടിൽ ഇതൊരു ആശ്രമമായിരുന്നു.
പിന്നീട് കാലക്രമേണ പല കൈമറിഞ്ഞ് ഒടുവിൽ 'സോവറിൻ ഓർഡർ ഓഫ് മാൾട്ട'യുടെ സ്വന്തമായി മാറുകയായിരുന്നു.
പതിനെട്ടാം നൂറ്റാണ്ടിൽ വാസ്‌തുശില്പി ജിയോവാനി ബാറ്റിസ്‌റ്റ പിരനേസിയാണ് ഈ വില്ലയും വാതിലുമെല്ലാം പുതുക്കിപ്പണിതത്.
അദ്ദേഹം ഈ വാതിലിന് നേരെ പൂന്തോട്ടത്തിലെ ചെടികൾ സെന്റ് പീറ്റേഴ്‌സ് ബസിലിക്ക കാണാൻ പാകത്തിൽ കൃത്യമായി ക്രമീകരിച്ചതാണോ അതോ യാദൃശ്ചികമായി സംഭവിച്ചതാണോ എന്നത് ഇന്നും ആർക്കുമറിയാത്ത ഒരു അദ്ഭുതമാണ്.

യാത്ര ചെയ്യുന്നവർ ശ്രദ്ധിക്കാൻ ✈️

റോമിലെത്തുന്നവർക്ക് ഈ അദ്ഭുത കാഴ്‌ച കാണാൻ യാതൊരു ഫീസും നൽകേണ്ടതില്ല, പ്രവേശനം തികച്ചും സൗജന്യമാണ്. എന്നാൽ എപ്പോഴും നല്ല തിരക്ക് അനുഭവപ്പെടുന്ന സ്‌ഥലമായതുകൊണ്ട് വരി നിൽക്കാൻ തയാറായി വേണം പോകാൻ. സ്‌മാർട്ട്ഫോണുകളിൽ ഈ താക്കോൽപ്പഴുതിലൂടെയുള്ള ദൃശ്യം കൃത്യമായി പകർത്തിയെടുക്കാൻ കുറച്ചു പാടാണെങ്കിലും, ഒരു കാമറയ്ക്കും ഒപ്പിയെടുക്കാൻ കഴിയാത്ത ആ അദ്ഭുതകാഴ്ച നിങ്ങളുടെ മനസ്സിൽ എക്കാലത്തും മായാതെ നിൽക്കും.